Суаресдан Салоҳгача. «Ливерпуль»нинг XXI асрдаги энг омадли трансферлари (фото)

«Ливерпуль» клуби барча даврларнинг энг кучли клублари қаторида саналиб келинган ва табиийки, жамоада дунёнинг энг кучли футболчилари тўп сурган. Клуб академиясидан Стивен Жеррард каби етук футболчилар етишиб чиқишига қарамай, раҳбарият доимо трансфер бозорида фаол кураш олиб борган ва кўплаб муваффақиятли харидларни амалга оширган. Қуйида Мерсисайд клубининг XXI асрдаги энг омадли трансферлари ҳақида фикр юритилади.

Пепе Рейна

Узоқ йиллар мобайнида «Ливерпуль» дарвозасини муносиб ҳимоя қилган Пепе Рейна 2005 йилда Испаниянинг «Вильярреал» клубидан ўша даврлар учун жуда юқори бўлган нарх — 10 миллион евро эвазига АПЛга кўчиб ўтганди. Рейна мерсисайдликлар таркибида қарийб 400 та ўйин ўтказади, бироқ у жамоаси билан мақтанишга арзигулик ютуқларни қўлга кирита олмайди. Бу натижаларда испаниялик посбоннинг «ҳиссаси» унчалик катта бўлмаган, боиси у камдан кам вазиятларда хатога йўл қўярди. Бунга исбот тариқасида Рейнанинг уч мавсум давомида Премьер Лиганинг «Олтин қўлқоп» мукофотини қўлга киритганини мисол келтириш мумкин. Умуман олганда, Рейнани Жеррард ва Алонсо сингари клуб афсоналаридан бири деб аташ мумкин.

Раҳим Стерлинг ва Филиппе Коутиньо

«Ливерпуль» таркибида мутлақо ўзгача ўйин намойиш этган икки футболчи — Стерлинг ва Коутиньога жамоа мухлисларининг меҳри бўлакча эди. Стерлингни қисман клуб тарбияланувчиси деб ҳисоблаш мумкин, у ёшлигида унчалик камтарона бўлмаган 700 минг евро харид қилинади ва клубнинг ёшлар жамоасида тўп тепади. Коутиньо эса «Интер»дан 13 миллион евро еврога сотиб олинганди. Уларни бирлаштириб турадиган жиҳат икки иқтидор эгасининг бошқа клубларга ўтишдаги трансфер суммаси. «Ливерпуль» англиялик вингернинг трансферидан («Манчестер Сити») 63 миллион евро даромад кўрган бўлса, бразилиялик хавбекнинг товон пули клуб ғазнасини қарийб 150 миллион еврога тўлдирди.

Хавьер Маскерано

Аргентиналикнинг футболчи 2007 йилда «Ливерпуль»га «Вест Ҳем»дан кўчиб ўтган. Унинг трансфер қиймати 22 миллион еврони ташкил қилган. Бироқ тўрт йилдан сўнг 20 миллион еврога «Барселона»га сотиб юборилади. Футбол тарихидаги энг яхши таянч ярим ҳимоячиларидан бири бўлган Маскерано атиги 4 мавсум давомида мерсисайдликлар билан бирга бўлади. Ўша йилларда бирорта ҳам соврин қўлга киритмаган бўлса-да, жамоа «олтин таркиб» дея эътироф этилар ва айнан Маскерона унинг мияси экани бот-бот таъкидланарди. Турли хил миш-мишларга кўра, Маскеранонинг Испанияга йўл олиши Торреснинг «Челси»га кетиб қолишига сабаб бўлган экан.

Дирк Кёйт

Нидерландия терма жамоаси собиқ ўйинчиси топ футболчи бўлмаслиги мумкин, аммо у юқори даражадаги ўйини ва меҳнатсеварлиги билан кўпчиликка ўрнак бўла оларди. У «Фейеноорд» клубидан бор-йўғи 18 миллион еврога сотиб олинганди. Кёйт Туманли Албионда 6 та ажойиб мавсумни ўтказди ва мухлисларнинг суюклисига айланди. Кёйт майдоннинг исталган нуқтасида ортиқча қийинчиликларсиз ҳаракатлана олиш қобилиятига эга эди. У ҳам ҳужумда ҳам ярим ҳимояда ва ҳимояда ҳам асқатарди. Зарурат бўлганида ҳатто дарвозани қўриқлаши мумкинлигига ҳам ҳеч кимда шубҳа бўлмаса керак.

Фернандо Торрес

Вақтида дунёнинг энг яхши ҳужумчилари орасида эътироф этилган Фернандо Торрес 2007 йилда Мадриднинг «Атлетико»сидан 38 миллионга сотиб олинади. Афсуски, футболчи «Ливерпуль»нинг энг яхши даврларида тўп сурмайди. Умуман олганда, жамоа ёмон ўйин намойиш этмаган, бироқ совринлар масаласида омади юришмаган. Жамоанинг энг яхши натижаси 2009/10 йилги мавсумдаги кумуш медаллар бўлган. Бу эса Торресдек иқтидорли ўйинчи учун жуда камлик қиларди. Бунинг устига Маскеранонинг жамоадан кетиши унинг ҳафсаласини пир қилади ва 2010 йилда «Челси»га ўтиб кетади. Шу билан Фернандонинг карьераси деярли якунланади. «Ливерпуль» эса унинг трансферидан 60 миллион евро даромад орттиради.

Луис Суарес

Шубҳасиз, Суареснинг трансфери клуб тарихидаги энг яхши битимлардан бири. Англиядаги фаолияти давомида Суарес нафақат сайёранинг энг яхши ҳужумчиларидан бирига айланди, балки мерсисайдликлар унинг трансферидан яхшигина пул ҳам ишлаб олишди. Форвард «Аякс»дан 27 миллион еврога сотиб олиниб, «Барса»га 82 миллион еврога пулланди. Ҳанузгача кўплаб мухлислар Торрес ва Суареснинг биргаликда ўйнашмаганидан афсусланади. Суареснинг бир ўзи ҳам яхши натижаларни қайд эта олди. У Англиядаги уч мавсумида 82 бор рақиблар дарвозасини ишғол этган.

Виржил ван Дейк

2019 йилги «Олтин тўп» совринида иккинчи бўлган, позицияси бўйича эса дунёнинг энг яхшиларидан бири ван Дейкнинг трансфери «Ливерпуль» учун 85 миллион еврога тушади. Ўз навбатида бу уни дунёнинг энг қиммат ҳимоячисига айлантиради. Виржил майдонда ҳақиқий «йиртқич»га айланади. Уни доғда қолдириш эса ҳамманинг ҳам қўлидан келавермайди.

Алиссон Бекер

«Ливерпуль»нинг яна бир энг омадли харидларидан бири Алиссон 2018- йилнинг ёзида 70 миллион евро эвазига жамоага келиб қўшилади. Тан олиш лозимки, у бундан кўпига ҳам лойиқдир. Унинг ишончли ўйини Клопп жамоасининг керакли очколарни қўлга киритишида муҳим аҳамият касб этади. Албатта, жамоанинг мудофаа чизиғи ҳам анча кучли. Бироқ Алиссон шунчаки ақл бовар қилмас «сейв»ларни амалга оширади. Агар у энг зўри бўлмаса, демак, шунчаки зўрлар орасида етакчи. Бразилиялик посбон бор-йўғи 27 ёшда ва унинг энг яхши ўйинлари ҳали олдинда.

Хаби Алонсо

Хаби Алонсо «қизиллар» сафида ажойиб беш мавсум ўтказган ва «Энфилд»нинг севимли футболчиларидан бирига айланган. 2004 йилда «Реал Соседад»дан 16 миллион еврога сотиб олинган Алонсо Рафа Бенитеснинг ўйин услубига жуда мос тушарди. Мерсисайдликлар сафида икки юздан ортиқ учрашувда майдонга тушиб, бир нечта муҳим совринларни, шу жумладан 2005 йилги Чемпионлар Лигасидаги ғалабага ўз ҳиссасини қўшади. У Жеррард билан майдонда шундай жуфтлик ярата олгандики, бу нафақат мухлисларнинг, балки рақиб жамоаларнинг ҳам эътиборига сазовор бўлганди. «Ливерпуль» ҳатто унинг трансферидан оз бўлса-да фойда кўрди. 2009 йилда «Реал» Алонсони 35 миллион еврога сотиб олди.

Муҳаммад Салоҳ

«Ливерпуль»нинг амалдаги етакчиси, Transfermarkt’га кўра жамоанинг энг қиммат ўйинчиси Муҳаммад Салоҳ «қизиллар» сафига 42 миллион евро эвазига «Рома»дан келиб қўшилган. Салоҳ худди Месси «Барселона»да ёки Роналду «Реал»да бўлгани каби «Ливерпуль»нинг ажралмас бир қисмига айланишга улгурган. Мисрлик ҳужумчи жамоанинг энг яхши тўпурари ва Чемпионлар Лигаси финалидаги ғалаба голи муаллифи ҳисобланади. Салоҳ – тезкор ҳамда техникаси юқори бўлган ажойиб футболчи. Айнан унинг келиши «Ливерпуль» ўйинини ижобий томонга ўзгартирди.

Юрген Клопп

Гап Мерсисайд клуби ҳақида кетар экан жамоанинг ҳозирги бош мураббийи Юрген Клоппни ёдга олмаслик мантиқсизлик бўларди. Зеро, айнан хизматлари туфайли жамоа Чемпионлар Лигасида ғолибликка эришди ва коронавирус туфайли тўхтаб қолган жорий йилги Англия чемпионатида пешқадамлик қилмоқда. Очиғини айтганда, Клопп трансфер қилинмаган, германиялик мутахассис 2015 йилда жамоага эркин агент сифатида келган. Унинг бошқарувидаги биринчи мавсум «Ливерпуль» учун кўнгилдагидек ўтмайди. Жамоа Премьер Лигани саккизинчи ўринда якунлайди. Бундан ташқари, Европа Лигаси финалида ҳам имконият бой берилади. Бироқ маълум вақт ўтгач, ҳаммаси ўз изига тушади. Клопп «Ливерпуль» муваффақиятларининг асосий муаллифи ҳисобланади. Тўғри, баъзи вазиятларда жамоага омад кулиб боқди, бироқ унинг қанчалик кучли эканини пайқаш учун мутахассис бўлиш шарт эмас.

Бошқа мақолалар: