O‘zbekiston hukumati 2020-yilda davlat budjetida tashqi qarzlarning chegaraviy miqdorini qayta ko‘rib chiqadi. Bu haqda moliya vazirining o‘rinbosari Odilbek Isoqov ma’lum qildi, deb yozmoqda “Gazeta.uz”.
Makroiqtisodiy barqarorlikni ta’minlash maqsadida 2020-yilga mo‘ljallangan davlat budjetida mamlakat nomidan yoki hukumat kafolati ostida tashqi qarzlarni jalb qilish bo‘yicha yangi imzolangan shartnomalar uchun eng yuqori miqdor 4 milliard dollarni tashkil etadi. Ushbu qarzni o‘zlashtirishning maksimal hajmi yiliga 1,5 milliard dollarni tashkil qiladi.
Moliya vaziri o‘rinbosarining so‘zlariga ko‘ra, o‘rta va uzoq muddatli istiqbolda davlat qarzini YaIMning 50 foizidan past darajada ushlab turish uchun 4 milliard dollar miqdorida cheklov belgilangan.
“Biz davlat qarzi qay darajada bo‘lishini aniqlash uchun 2030-yilgacha inflyatsiya, YaIM va valyuta kursi bo‘yicha kutilmalarimizga asoslanib, prognoz va modellashtirishni o‘tkazdik. Ushbu prognozlar asosida biz 4 milliard dollar miqdorni belgilagan edik”, — dedi Odilbek Isoqov.
Koronavirus pandemiyasini hisobga olgan holda hukumat tashqi qarz olish bo‘yicha cheklovlarni qayta ko‘rib chiqishga majbur. Biroq bu “institutsional nuqtayi nazardan” davlat qarzini boshqarish bo‘yicha Moliya vazirligining konservativ yondashuviga ta’sir qilmaydi.
“Bu yil belgilangan eng yuqori miqdor qayta ko‘rib chiqiladi. Hozir u qanchaga o‘zgarishini ayta olmayman. Hozir biz ushbu masala bo‘yicha Investitsiyalar va tashqi savdo vazirligi bilan ishlamoqdamiz. Ular davlat qarzi bilan moliyalashtiriladigan qaysi loyihalarni amalga oshirish muddati oldinga yoki orqaga siljishini aytadi. Bu nafaqat iqtisodiy muammo, balki global ta’minot zanjiri muammosidir. Ehtimol, ba’zi loyihalarni amalga oshirish muddatlari o‘zgartirilishi mumkin”, — dedi vazir o‘rinbosari.
Qarz olish va uni o‘zlashtirish chegaralari 2021-yil budjetida koronavirus pandemiyasining mamlakat iqtisodiyotiga ta’siri tahlilini hisobga olgan holda qayta ko‘rib chiqiladi.
2020-yil 1-yanvar holatiga ko‘ra, O‘zbekistonning tashqi davlat qarzi 15,6 milliard dollarni yoki yalpi ichki mahsulotning 27 foizini tashkil etdi. Bunda hukumat nomidan olingan qarzlar 10,7 milliard dollarga, hukumat kafolati ostida olingan qarzlar 4,9 milliard dollarga teng bo‘ldi.
Avvalroq O‘zbekiston pandemiya sharoitida iqtisodiyotni qo‘llab-quvvatlash uchun 1,6 milliard dollar qarz olish bo‘yicha kelishuvlarga erishgani haqida xabar berilgan edi. Prezidentning 22-aprelda imzolangan qaroriga ko‘ra, O‘zbekiston pandemiya oqibatlarini yumshatish uchun 3,1 milliard dollar jalb qilmoqchi.
Izoh (0)