Россия пойтахти Москва шаҳри расмийлари коронавирус тарқалишига қарши курашиш учун шаҳарга ҳарбий бўлинмаларни киритишни талаб қиладиган сценарийни амалга оширишни истамайди. Бу ҳақда шаҳар мэри Сергей Собянин маълум қилди, деб ёзмоқда «РБК».
Собяниннинг сўзларига кўра, кўплаб йирик шаҳарларда вазият бироз фарқ қилади, у шаҳарларда дастлаб жуда юмшоқ, демократик чоралар жорий қилинмоқда, кейин эса шаҳар кўчаларига ҳарбийларни киритишга тўғри келмоқда. Унинг айтишича, Москвада бундай сценарийни амалга ошириш истаги йўқ, шунинг учун шаҳарда «ўзини яккалаш»нинг энг мақбул тартиби жорий қилинган.
Шаҳар мэрининг қайд этишича, москваликларнинг кўпчилиги ўзини жуда масъулиятли тутмоқда ва шаҳарда ўрнатилган чекловларга амал қилмоқда, айнан ана шу нарса шаҳар расмийларининг чораларни қаттиқлаштиришига йўл қўймаяпти.
Собяниннинг сўзларига кўра, шаҳарда касалланганлар сони кунига 8-15 фоизга ўсмоқда. Унинг айтишича, шаҳарда касаллик ҳали чўққисига чиқмади ва бу йўлнинг ярми ҳам босиб ўтилгани йўқ.
Шаҳар мэрининг маълум қилишича, айни пайтда Москванинг соғлиқни сақлаш тизими беморлар оқимини бошқара олмоқда, бироқ бундан кейин ҳам шундай давом этиш учун унинг имкониятларини ошириш керак. Шу сабабли шаҳар расмийлари яқин икки ҳафта ичида COVID-19’га қарши кураш учун ажратилган жойлар сонини икки мартага оширишни режалаштирмоқда.
Аввалроқ Москва мэри коронавирус белгилари бор шахслар билан яшаётганларнинг кўчага чиқишига рухсат берган эди.
Сўнгги маълумотларга кўра, Россияда коронавирус қурбонлари сони 555 кишига етди. Касалланганлар сони 63 минг кишига яқинлашди.
Изоҳ (0)