Қозоғистон полицияси коронавирусга чалинган эркакнинг фоҳишалар билан алоқасини яшириб келгани маълум бўлди
Қозоғистоннинг Манғистов вилояти полиция ходимлари коронавирусга чалинган фуқаронинг фоҳишалар билан тўғридан-тўғри алоқасига доир фактни яширганликлари маълум бўлди. Бу ҳақда Коррупцияга қарши кураш бўйича Республика агентлиги аппарати раҳбари Куаниш Жапаков маълум қилди.
«Манғистов вилояти департаменти вилоят прокуратураси билан ҳамкорликда Ақтау шаҳри ҳудудида фоҳишабозлик учун тармоқлар ташкил этишда чет эл фуқароларига ҳомийлик қилган полиция департаменти мансабдор шахсларининг ноқонуний фаолиятига чек қўйилди. Вилоят ҳудудида карантин бўлишига қарамай, полиция фоҳишахонанинг ноқонуний фаолиятини тўхтатиш чораларини кўрмаган ва жиноий фаолиятни қўллаб-қувватлашда давом этган. Коронавирусга чалинган шахснинг фоҳишалик билан шуғулланувчи хориж фуқаролари билан бўлган тўғридан-тўғри алоқасини яширган», — дейди Жапаков.
Куаниш Жапаковнинг таъкидлашича, коррупцияга қарши курашиш хизмати томонидан порахўрлик, мансаб ваколатларини суиистеъмол қилиш, фоҳишахоналар ташкил этиш ва қўшмачилик билан шуғулланиш, шунингдек, инсонлар соғлиғи ва ҳаётига хавф туғдирувчи маълумотларни яшириш борасида тергов ишларини олиб бормоқда.
Жапаковнинг сўзларига кўра, натижада 87 киши изоляцияга олинган, хусусан, фоҳишахона сақлаганлар ҳам. Улар орасидаги икки нафар хориж фуқаросида коронавирус инфекцияси аниқланган.
Аввалроқ ижтимоий тармоқларда Қозоғистонда COVID-19 коронавируси аниқланган икки нафар Ўзбекистон фуқароси «енгил табиатли» қизлар эканлиги тўғрисида хабарлар тарқалган эди. Кейинроқ Қозоғистон полицияси бу хабар ҳақиқатга тўғри келмаслигини маълум қилди.
Эслатиб ўтамиз, Қозоғистонда коронавирус билан касалланганлар сони айни вақтда 2191 нафарни ташкил этмоқда. Мамлакатда COVID-19 коронавирус инфекцияси тарқалиши бошланганидан буён 19 киши вирус қурбонига айланган, шунингдек, 515 бемор даволанишга муваффақ бўлган.
