Qozog‘istonning Mang‘istov viloyati politsiya xodimlari koronavirusga chalingan fuqaroning fohishalar bilan to‘g‘ridan to‘g‘ri aloqasiga doir faktni yashirganliklari ma’lum bo‘ldi. Bu haqda Korrupsiyaga qarshi kurash bo‘yicha Respublika agentligi apparati rahbari Kuanish Japakov ma’lum qildi.
“Mang‘istov viloyati departamenti viloyat prokuraturasi bilan hamkorlikda Aqtau shahri hududida fohishabozlik uchun tarmoqlar tashkil etishda chet el fuqarolariga homiylik qilgan politsiya departamenti mansabdor shaxslarining noqonuniy faoliyatiga chek qo‘yildi. Viloyat hududida karantin bo‘lishiga qaramay, politsiya fohishaxonaning noqonuniy faoliyatii to‘xtatish choralarini ko‘rmagan va jinoiy faoliyatni qo‘llab-quvvatlashda davom etgan. Koronavirusga chalingan shaxsning fohishalik bilan shug‘ullanuvchi xorij fuqarolari bilan bo‘lgan to‘g‘ridan to‘g‘ri aloqasini yashirgan”, — deydi Japakov.
Kuanish Japakovning ta’kidlashicha, korrupsiyaga qarshi kurashish xizmati tomonidan poraxo‘rlik, mansab vakolatlarini suiiste’mol qilish, fohishaxonalar tashkil etish va qo‘shmachilik bilan shug‘ullanish, shuningdek, insonlar sog‘lig‘i va hayotiga xavf tug‘diruvchi ma’lumotlarni yashirish borasida tergov ishlarini olib bormoqda.
Japakovning so‘zlariga ko‘ra, natijada 87 kishi izolyatsiyaga olingan, xususan, fohishaxona saqlaganlar ham. Ular orasidagi ikki nafar xorij fuqarosida koronavirus infeksiyasi aniqlangan.
Avvalroq ijtimoiy tarmoqlarda Qozog‘istonda COVID-19 koronavirusi aniqlangan ikki nafar O‘zbekiston fuqarosi “yengil tabiatli” qizlar ekanligi to‘g‘risida xabarlar tarqalgan edi. Keyinroq Qozog‘iston politsiyasi bu xabar haqiqatga to‘g‘ri kelmasligini ma’lum qildi.
Eslatib o‘tamiz, Qozog‘istonda koronavirus bilan kasallanganlar soni ayni vaqtda 2191 nafarni tashkil etmoqda. Mamlakatda COVID-19 koronavirus infeksiyasi tarqalishi boshlanganidan buyon 19 kishi virus qurboniga aylangan, shuningdek, 515 bemor davolanishga muvaffaq bo‘lgan.
Izoh (0)