Тошкент шаҳар ИИББ ППХ бригадаси ходимларининг хизмат машинасида чақалоқ дунёга келди. Бу ҳақда пойтахт ИИББ ахборот хизмати хабар берди.
Таъкидланишича, ППХ ходимлари тунги соат 02:00 ларда Учтепа тумани Истироҳат кўчаси ва Тошкент ҳалқа автомобиль йўли кесишмасида турган икки аёлни кўриб қолган. Аёллардан бири ҳомиладор бўлган. ППХ ходимлари уларни зудлик билан туғруқхонага етказиш мақсадида бўлажак она ва унинг қайнонасини машинага ўтқазиб, энг яқин шифохонага йўл олган.
3-сон шаҳар болалар клиник шифохонаси (собиқ «Она ва бола» маркази)га озгина масофа қолганда аёлни тўлғоқ тутган. Шунда сардор С.Муродов ва Б.Тошпўлатов биринчи тиббий ёрдам кўрсатиб, чақалоқнинг дунёга келишига ёрдам берган.Туғруқдан сўнг она ва бола шифокорларга топширилган.
Тиббиёт ходимлари она ва чақалоқнинг аҳволи қониқарли эканини, бола 3100 грамм туғилганини айтиб, ходимларга миннатдорчилик билдирган.
Аввалроқ Мудофаа вазирлигининг вертолётида туғруқхонага олиб борилган деҳқонободлик аёл ўғил фарзандли бўлгани ҳақида хабар берилганди.
Изоҳ (0)