Дунёга машҳур уй жиҳозлари сотадиган IКЕА дўконларининг эгаси Ingka Group компанияси карантиндан кейин чақалоқлар туғилишининг ортишини (baby boom) тахмин қилди. Шу сабабли компания болалар жиҳозларини ишлаб чиқаришга инвестиция киритишини маълум қилди. Бу ҳақда Reuters хабар берди.
Компания томонидан маълум қилинишича, коронавирус пандемияси сабабли унинг сотувлари ҳажми 60 фоизга қисқарган.
Ingka Group бош директори Йеспер Бродиннинг сўзларига кўра, карантин вақтида онлайн харидлар сони ўтган йилга нисбатан икки бараварга кўпайган, баъзи мамлакатларда эса ўн мартага ошган. Даниядаги дўконлар карантиндан олдинги сотувлар даражасига қайтган. Қайд этилишича, одамлар уйда қолаётганлиги сабабли ошхона жиҳозлари кўпроқ харид қилинмоқда. Лекин компания болалар жиҳозларига катта инвестиция киритишни режалаштирмоқда.
Йеспер Бродиннинг фикрича, 7 ёки 8 ойдан сўнг baby boom бўлиши, яъни кўплаб чақалоқлар туғилишини кутиш мумкин. Шу боис у бозорда етарлича таклиф бўлиши кераклигини айтган. Бродиннинг сўзларига кўра, аввалги инқирозлар ҳам шундай ҳолатга олиб келган.
Унинг айтишича, компания дўконларида арзонроқ жиҳозларга бўлган талаб нисбатан ошган. Бродин ушбу ҳолат карантиндан кейин ҳам давом этиши мумкинлигини айтган, чунки одамлар кўп пул йўқотмоқда.
Компаниянинг ўз фаолиятини қайта тиклаган Хитойдаги дўконларда савдо бир йил олдинги сотувлар даражасига қайтган. Ухань шаҳридаги дўконлар яқин ҳафталарда очилиши айтилган.
2019 йилнинг август ойи кўрсаткичларига кўра, компаниянинг бир йиллик савдоси 36,7 миллиард еврога тенг бўлган, бундан 11 фоизи онлайн савдога тўғри келади.
Изоҳ (0)