Тошкент вилояти ҳудудидан ўтган М-39 автомобиль йўлида пиёдани уриб юбориб, ҳодиса жойидан яширинган ҳайдовчи топилди. Бу ҳақда ИИВ ҳузуридаги Тергов департаменти хабар берди.
Маълумотларга кўра, 17 апрель куни соат 23:50 ларда номаълум автомашина Чиноз тумани ҳудудидан Тошкент шаҳар томон ҳаракатланиб, Зангиота туманидан ўтган М-39 йўли 818-километри автомобиль қатнов қисмида 33 ёшли фуқаро В.Р.ни уриб юбориб, ҳодиса жойидан яширинган. Авария оқибатда пиёда ҳодиса жойида вафот этган.
Ҳолат юзасидан номаълум шахсга нисбатан Зангиота тумани ИИБ ҳузуридаги Тергов бўлими томонидан Жиноят кодексининг 266-моддаси 2-қисми («Транспорт воситалари ҳаракати ёки улардан фойдаланиш хавфсизлиги қоидаларини бузиш») ва 117-моддаси 2-қисми («Хавф остида қолдириш») билан жиноят иши қўзғатилган.
Дастлабки тергов жараёнида олиб борилган тергов-тезкор ҳаракатлари натижасида ушбу йўл-транспорт ҳодисасини Тошкент шаҳар Юнусобод туманида яшовчи 26 ёшли А.Ш. бошқарувидаги Nexia русумли автомашинасида содир этганлиги аниқланиб, процессуал тартибда ушланган.
Изоҳ (0)