Шифтда ҳам ҳаракатлана олиши айтилаётган Brabham BТ62 гиперкарига оид тафсилотлар ошкор қилинди

«Formula-1» пойгаларининг уч карра ғолиби Жек Брэбэмнинг ўғли Дэвидга тегишли Brabham Automotive компанияси 2018 йилда ўзининг илк лойиҳасини — BТ62 гиперкарини тақдим этганди. Орадан қарийб икки йил ўтиб, компания ушбу гиперкар аэродинамикаси ҳақида айрим маълумотлар билан бўлишишга қарор қилди. Масалан, икки эшикли машина муаллифларининг сўзларига кўра, гиперкар соатига 265 километр тезликда шифтда ҳам ҳаракатланиши мумкин, деб хабар беради Motor.

Brabham BТ62’ни яратишда гидродинамик ҳисоблаш усулларидан (CFD) кенг фойдаланилган бўлиб, бу автомобиль атрофидаги ҳаво оқимларини визуал равишда акс эттиришга имкон берган. Компьютерда олинган маълумотлар ҳақиқий тест натижалари билан солиштирилганида моделнинг аниқлиги ва олинган қийматлар тўғрилиги ўз исботини топган. Ўз навбатида, CFD-модель кейинчалик гиперкар аэродинамикасини оптималлаштириш асосига айланган. Натижада қияликлари ҳаво оқими босимини камайтириб, автомобилнинг орқа ва олдида кучли босим зоналарини ҳосил қиладиган керакли шаклга эга кузов яратилган.

Симуляциядан кўриш мумкинки, сплиттер билан тўқнашувдан кейин ҳаво радиаторларни совитиш каналлари ва бампер қирқимлари орқали ташқарига чиқиб, кузов ёнлари билан қия йўналтирилмоқда. Олд қиррасида эса кучли босим зонаси шаклланиб, машинани янада кучлироқ пастга босишга имкон беради.

BТ62 таг томонидан тўлиқ композицион материаллар билан қопланган, марказ қисмида эса аэродинамик босим статик оғирлик марказига яқинлашади, бу эса катта тезликда ҳам бурилишларни амалга оширишга имкон беради.

Йўл шароитида максимал боғланишни таъминлашда босим кучи катта роль ўйнайди. Хусусан, унинг асосий қисмини орқа антиқанотлар ҳосил қилади. Ушбу элементнинг аэродинамик сифати 5:1 га тенг, яъни олд тарафдаги ҳар бир Ньютон қаршилик кучини у беш Ньютон пастга босиш кучланишига айлантиради.

Соатига 300 километр тезликда гиперкар 1600 килограмм эквивалент босим ҳосил қилади, олд ва орқа ўқидаги эгилиш мос равишда 8 ҳамда 18 миллиметрга етади. Муҳандисларнинг ҳисоб-китобларига кўра, BТ62 соатига 265 километр тезликда «оёғи осмонга қараган» ҳолда ҳаракатланиши мумкин.

Ҳозирда Brabham BТ62’нинг учта версияси тақдим этилди: Ultimate Track Car, оддий йўлларга мўлжалланган Road Compliant Conversion ва пойга вариант — Competition.

Моделларга 710 от кучига эга 5,4 литрли V8 атмосфера двигатели ўрнатилган. Узатмалар қутиси — олти поғонали Holinger.