1500 от кучига эга Triton электройўлтанламаси бир марта қувватланиш орқали 1127 км йўл босади

Американинг Triton Solar стартапи ўзининг илк моделини тақдим этди: 1500 от кучига эга улкан йўлтанламасга тўртта электромотор ўрнатилган. Лойиҳа Triton Модель H номини олди, деб хабар беради Motor.

Стартап дизайнини яратишда Cadillac Escalade’га асосланилганини кўриш мумкин: электромобиль олд қисми ва кузов шакли ушбу моделни ёдга солади. Triton узунлиги 5690 миллиметрни, ғилдираклар базаси эса 3302 миллиметрни ташкил этади. Салон саккиз кишига мўлжалланган. 2,4 тонна келадиган йўлтанламас етти тоннали тиркамани тортишга қодир.

Triton Solar йўлтанламаси учун умумий қуввати 1500 от кучига эга тўртта электромотор тайёрланган бўлиб, 200 киловатт/соат қувватли батареялар ёрдамида ҳаракатга келади. Бу каби моторга эга электромобиль соатига 60 мил (97 км/соат) тезликка 2,9 сонияда чиқа олади. Бир марта қувватланиш орқали машина 1127 километр йўл босишга қодир.

Компания Triton Модель H учун буюртмаларни қабул қилишни бошлади. Буюртмани расмийлаштириш учун депозитга 5000 доллар қўйиш ва кейинги беш кун давомида моделнинг тўлиқ нархи — 135 минг доллар тўланиши керак.

Triton Solar ҳозирча модель прототипини ҳам, серияли версиясини ҳам тақдим этгани йўқ, фақатгина 3D-модели ва техник тавсифлари билан чекланган.