Қорақалпоғистон юқумли касалликлар шифохонасида коронавирус инфекциясига чалинган 15 нафар бемор соғайди. Бу ҳақда Соғлиқни сақлаш вазирлиги хабар берди.
Маълум қилинишича, соғайганларнинг 2 нафари Тошкент шаҳридан, 13 нафари эса Қорақалпоғистондан бўлиб, барчаси коронавирусга чалинганлар билан мулоқот орқали касалликни юқтириб олган. Беморларнинг 6 нафари эркак, 9 нафари аёл бўлиб, улар орасида энг каттаси 63 ёшда бўлса, энг кичиги 2019 йил туғилган. Самарали даволаш муолажалари туфайли бугунги кунда лаборатория текширувлари уларнинг дарддан бутунлай фориғ бўлганини кўрсатди.
Ҳозирга қадар Ўзбекистон бўйлаб коронавирус инфекциясидан буткул соғайганлар сони 372 нафарга етди.
Эслатиб ўтамиз, 21 апрель куни Ўзбекистон бўйича 96 киши коронавирусдан соғайиб, реабилитацияга олинган эди.
Ўзбекистонда 22 апрель соат 10:00 ҳолатига кўра, коронавирус инфекциясини юқтириб олганлар сони 14 нафарга ошиб, 1692 нафарни ташкил этмоқда. Ўзбекистонда 15 мартдан буён коронавирусга чалинган беморларнинг олти нафари вафот этди, Хорижда камида 73 ўзбекистонликда коронавирус аниқланган (энг кўпи — 42 нафари — Россияда), уларнинг тўрт нафари вафот этгани маълум қилинган.
Изоҳ (0)