Парижда кўчаларни ювишда фойдаланиладиган техник сув қувурларида коронавирус инфекцияси излари топилди. Бу ҳақда 19 апрель, якшанба куни, Le Monde нашри хабар берган.
Қайд этилишича, Париж сув таъминоти ташкилотининг Eaude Paris лабораторияси 27 намунадан 4 тасида SARS-CoV-2’нинг кичик изларини топган. Шу сабабли эҳтиёт чораси сифатида ушбу қувурлардаги сувдан фойдаланиш дарҳол тўхтатилган.
«Излар арзимас миқдорда бўлса ҳам, бари бир из. Шу сабабли мутахассислар унинг қанчалик хатарли эканлигига баҳо беришлари учун эҳтиёткорлик юзасидан Ҳудудий соғлиқни сақлаш агентлигига мурожаат қилишга қарор қилдик», — деган Париж мерининг ўринбосари Селио Блоэль.
Шу билан бирга, унинг ичимлик суви қувурларига тушиши хавфи йўқлиги, ундан қўрқмасдан бемалол фойдаланишда давом этиш мумкинлигини таъкидлаган.
Жонс Ҳопкинс маълумотларига кўра, айни пайтда Францияда коронавирусга чалинганлар сони 154 мингдан, вафот этганлар сони эса 19,7 мингдан ошган. Мамлакат касалланганлар сони бўйича АҚШ (760 мингдан ортиқ), Испания (200 мингдан ортиқ) ва Италиядан (178 мингдан ортиқ) сўнг тўртинчи ўринда бормоқда.
Изоҳ (0)