Тошкент шаҳридаги Эпидемиология, микробиология ва юқумли касалликлар илмий-текшириш институти клиникасида коронавирусга чалинган навбатдаги 2 нафар бемор буткул соғайди. Улар 20 апрель куни Соғлиқни сақлаш вазирлиги масъуллари иштирокида Республика ихтисослаштирилган терапия ва тиббий реабилитация илмий-амалий тиббиёт марказига кузатилди. Бу ҳақда Соғлиқни сақлаш вазирлиги хабар берди.
Соғайганлардан бири 19 ёшли қиз Тошкент шаҳридан бўлиб, коронавирус инфекциясига чалинган беморлар билан мулоқот орқали касалликни юқтириб олган. Иккинчи бемор эса Россиядан чартер рейс орқали Тошкентга олиб келинган ва карантинга олинган. Коронавирус инфекцияси аниқлангач, мазкур бемор Эпидемиология, микробиология ва юқумли касалликлари илмий-текшириш институти клиникасига ётқизилган. Сўнгги текширувлар ушбу беморларда инфекция йўқлигини кўрсатди.
Мазкур клиникада шу пайтга қадар 29 киши коронавирусдан тузалишга муваффақ бўлди.
Тошкент тиббиёт академияси кўп тармоқли клиникасида ҳам коронавирус инфекциясига чалинган 21 нафар бемор буткул соғайди ва 20 апрель куни Республика ихтисослаштирилган терапия ва тиббий реабилитация илмий-амалий тиббиёт марказига кузатилди.
Тузалганларнинг 13 нафари чартер рейс орқали Туркиядан Тошкентга келган бўлиб, «Ботаника» санаторийси ҳамда Ўртасарой карантин марказига жойлаштирилган эди. Уларда коронавирус инфекцияси тасдиқлангач, Тошкент тиббиёт академияси кўп тармоқли клиникасида даволанишни бошлаган. Қолган 8 нафар бемор эса коронавирус инфекциясига чалинган беморлар билан мулоқот орқали касалликни юқтириб олган.
Беморлардан 5 нафари эркак, 16 нафари аёллардир. Улардан 13 нафари Тошкент шаҳридан, 6 нафари Тошкент вилоятидан, Фарғона ва Навоий вилоятларидан эса 1 нафардан бемор тузалганлар қаторидан ўрин олди. Улар орасида энг каттаси 57 ёшда бўлса, энг кичиги 5 ёшда.
Тошкент тиббиёт академияси кўп тармоқли клиникасида шу пайтга қадар коронавирусдан тузалганлар сони 32 нафарга етди.
Соғлиқни сақлаш вазирлиги 20 апрель куни мамлакат бўйича 36 нафар бемор коронавирус инфекциясидан бутунлай соғайгани ҳақида хабар берди. Ўзбекистон бўйича коронавирусдан тузалганларнинг умумий сони 261 кишига етди.
Аввалроқ Андижонда 2 киши, Бухорода 11 киши касалликдан соғайгани ва мамлакатда тузалганларнинг умумий сони 238 кишига етгани ҳақида хабар берилган эди.
Ўзбекистонда 20 апрель соат 14:30 ҳолатига кўра, коронавирус инфекциясини юқтириб олганлар сони 1582 нафарни ташкил этмоқда. Мамлакатда 15 мартдан буён коронавирусга чалинган беморларнинг беш нафари вафот этди, Бундан ташқари, хорижда 73 ўзбекистонлик коронавирусга чалинган, уларнинг тўрт нафари вафот этган.
Эслатиб ўтамиз, Ўзбекистонда карантин тартиби 10 майга қадар узайтирилди, Республика махсус комиссияси карантин даври учун янги тартибларни эълон қилди.
Изоҳ (0)