Тошкент вилояти асаларичилари уюшмаси асаларичиларнинг шахсий автомобилда ҳаракатланиши учун рухсат олишда ҳукуматдан ёрдам сўрамоқда. Бу ҳақда «Gazeta.uz» хабар берди.
Уюшма аъзоси Анатолий Бондаренконинг маълум қилишича, шахсий транспортда ҳаракатланиш учун стикер йўқлиги сабабли, Тошкент шаҳрида яшовчи асаларичилар шаҳар ташқарисида жойлашган асаларилар уяларида ишлай олмаяпти.
«Муаммо жуда катта. Ҳозир жуда муҳим давр — айни пайтда бутун йил ҳосили учун пойдевор қўйилади. Агар биз ҳозир ҳаракатлана олмасак, асаларилар, умуман, йўқ бўлиши мумкин чунки улар билан ишлаш, уларни озиқлантириш керак. Акс ҳолда улар очликдан ўлиши ёки шунчаки учиб кетиши мумкин. Жуда масъулиятли пайт. Бизни фермерлар кутмоқда — уларнинг боғларини, ўсимликларини ва бутун экинларини чанглантиришимиз керак», — деди Анатолий Бондаренко.
Чанглантириш мева-сабзавотларнинг ҳосилдорлигини оширишга ёрдам берадиган муҳим жараён ҳисобланади.
Анатолий Бондаренконинг айтишича, асалариларнинг дарахтлар ва экинларни чанглантириши ҳосилдорликни 50 фоизгача оширишга ёрдам беради.
Асаларичининг таъкидлашича, транспорт воситалари, шу жумладан велосипед ва скутерларнинг ҳаракатига қўйилган чеклов уларнинг ишини анчагина мураккаблаштирди.
Унинг айтишича, Тошкент вилоятининг Юқори Чирчиқ ва Тошкент туманларида яшовчи асаларичилар имконини топиб, ҳаракатланмоқда. Бироқ Тошкент шаҳрида яшовчи ва хўжалиги Тошкент вилоятида бўлган асаларичилар ўз автомобилида ҳаракатлана олмаяпти, баъзан улар 15—18 километр масофани пиёда босиб ўтишга мажбур бўлмоқда.
Анатолий Бондаренконинг қайд этишича, боғларда дарахтлар гуллаши тугагандан кейин асаларичилар янги жойларга ўтиши керак бўлади. Хусусан, тоғолди ва ундан юқори ҳудудларга кўчиш зарур бўлади. Агар бу ишлар амалга оширилмаса, бу улар учун ҳалокатга тенг. Асаларичилик доимий ҳаракат билан боғлиқ. Экин майдонлари жуда кам бўлиб, улар маълум вақт давомида чанг ажратади. Асаларичиликнинг ривожи айнан апрель—май ойларида тоғолди ҳудудларида юз беради.
Уюшма аъзосининг таъкидлашича, асаларичилар асосан енгил автомобилларда ҳаракатланади, юк машинасига эга бўлганлар кам. Юк машиналари ҳам асосан асалари инлари ортилган тиркамаларни тунда кўчириш учун ишлатилади.
Қайд этилишича, транспорт воситаси Тошкент шаҳрида ташкил қилинаётган кўчма ярмаркаларга асал етказиб бериш учун ҳам зарур.
Асаларичилар уюшмаси раиси Бахтиёр Ҳакимовнинг маълум қилишича, у Ўзбекистон Ички ишлар вазирлигига хат билан мурожаат қилган ва автомобили учун рухсатнома керак бўлган асаларичиларнинг рўйхатини юборган, бироқ кейинроқ мурожаат 15 кун ичида кўриб чиқилишини билган.
Уюшма раисининг айтишича, ҳамма ундан жавоб кутмоқда. Асаларичилар арилар тез орада ўлиши мумкинлигини айтмоқда. Ариларсиз қишлоқ хўжалигида ҳосилдорлик 30—50 фоизга тушиб кетиши мумкин.
Уюшмада рўйхатдан ўтган 300 нафар аъзодан 81 нафарига автомобилда ҳаракатланиш учун рухсатнома керак. Бироқ уюшмада рўйхатдан ўтмаган бундан ҳам кўпроқ аъзо мавжуд бўлиб, улар ҳам стикерга муҳтож. Тошкент вилояти асаларичилар уюшмаси ихтиёридаги асаларилар оилаларининг умумий сони 45 мингтани ташкил қилади.
Қайд этилишича, Президент Шавкат Мирзиёев раислигида 14 апрель куни бўлиб ўтган йиғилишда жорий йилда асал тайёрлашни беш бараварга ошириш, бунинг учун ўрмон хўжалигини тўлиқ ишга солиш зарурлиги таъкидланган. Шунингдек, асаларичилик кластерларини ташкил қилиш бўйича ҳам вазифалар белгилаб олинган.
Бахтиёр Ҳакимовнинг айтишича, агар шахсий автомобилда ҳаракатланишга рухсат этилмаса, бу вазифаларни бажариб бўлмайди. Унинг маълум қилишича, тадбиркорлар фақат қатъий белгиланган йўналиш ва жойлар бўйича ҳаракат қилади.
Уюшма раҳбарининг айтишича, у бош вазирнинг қишлоқ хўжалиги ва озиқ-овқат соҳалари бўйича ўринбосари Ўктам Барноевга муаммонинг ечимида кўмак беришни сўраб хат жўнатишни режалаштирмоқда.
Эслатиб ўтамиз, Ўзбекистонда 30 мартдан бошлаб енгил автомобиллар махсус рухсатнома асосида ҳаракатланиши мумкин. Мазкур рухсатномаларни бериш 9 апрелда тўхтатилган. Баъзи транспорт воситаларининг ҳаракати учун рухсатнома талаб этилмайди.
Маълумот учун, Республика махсус комиссияси томонидан коронавирус инфекцияси кенг тарқалишининг олдини олиш мақсадида ҳозирга қадар жорий этилган барча карантин чекловлари 2020 йилнинг 10 майига қадар узайтирилди ва мазкур даврда амалга ошириладиган қўшимча чора-тадбирлар эълон қилинди.
Изоҳ (0)