Тони Фергюсон Ҳабиб Нурмагомедовни итга қиёслади

Америкалик яккакурашчи Тони Фергюсон енгил вазн тоифасида UFC чемпиони Ҳабиб Нурмагомедов борасида кескин фикрлар билдирди.

«Фикримча, унинг кетиш вақти келди ва у бу ишни бажарди. Гап UFC’да эмас, Ҳабиб буни ўзи англаб турибди. У қалтироқ оёқлари орасига думини қисган итдек қочиб қолди.

Жаҳонда кўп воқеалар бўлмоқда, умид қиламанки, ҳозир Ҳабиб ўз оиласи билан ва хавфсизликда. Уларда ҳаммаси жойида деб умид қиламан. Гап унинг оиласи ҳақида борганда, мен ҳеч қачон кимнидир ҳақорат қилишга уринмайман. Унда шуғулланиш учун шароит борлигига ишонгим келади», — дейди Фергюсон.

Эслатиб ўтамиз, Нурмагомедов ва Фергюсон ўртасидаги жанг 18 апрель куни Нью-Йоркдаги UFC 249 кечасида бўлиб ўтиши режалаштирилганди. Март ойида Ҳабиб ва унинг жамоаси АҚШдаги машғулот базасини тарк этиб Россияга келди ҳамда апрелнинг бошларида карантин сабаб мамлакатни тарк этолмаслигини маълум қилди. Шу тариқа мазкур жангчилар иштирокидаги тўқнашув бешинчи марта бекор бўлди.

UFC эса мусобақани бекор қилмади ва Нурмагомедов ўрнига Жастин Гэтжи иштирок этишини маълум қилди. Бироқ кейинчалик UFC 249 мусобақаси коронавирус сабаб қолдирилди.