Ҳабиб Нурмагомедов UFC’га қайтиши ҳақида: Бу менинг UFC тарихида катта устунликка эришган 4 йилим сифатида эсда қолади

Енгил вазн тоифасида UFC чемпиони Ҳабиб Нурмагомедов 2016 йилда ташкилотнинг чемпионлик камарига эга чиқишга яқин келганини ёдга олди. Спортчи кетма-кет олтита баҳсни ўз фойдасига ҳал қилган, бироқ кейинчалик тиззасидан жароҳат олганди.

«Роппа роса тўрт йил аввал кетма-кет олтита жангда ютган ҳолда камарга яқин келгандим. Аммо тиззамдан жиддий жароҳат олдим ва мана бу видеода мен улоқтириб ташлаган жангчи [Рафаэл дос Аньос] чемпион бўлди. Тикланиш жараёнида яна тиззамни шикастлаб олдим, кейин эса қовурғамдан жароҳат олдим. Икки йил ўтиб қайтишга эришдим.

Бироқ қайтганимдан кейинги жараён энди тарих. Бу UFC тарихида катта устунликда ўтган тўрт йиллик сифатида эсда қолади.  Бу фактлар билан ҳеч ким баҳслаша олмайди, бу кимгадир ёқади, яна кимгадир йўқ. Қизиғи шундаки, биз олға юришда давом этамиз», — дея ёзади Нурмагомедов Instagram саҳифасида.

Маълумот учун, Ҳабиб 2014 йилда Рафаэл дос Аньосга қарши жангдан сўнг икки йил ўтиб октагонга қайтади. Учта жангдан сўнг, 2018 йилнинг апрелида Александр Эл Яквинтани мағлуб этиб, чемпионлик камарига эга бўлади. Кейинчалик Конор Макгрегор ва Дастин Порьега қарши жангларда ушбу камарни ҳимоя қилади.

https://www.instagram.com/p/B_LFu9BlRR2/