Бокс супер оғир вазн тоифасининг WBA Супер, WBO, IBF йўналишлари бўйича Жаҳон чемпиони Энтони Жошуа келажакдаги режалари билан ўртоқлашди.
Британиялик спортчи айрим рақиблар билан тўқнаш келмагунга қадар боксдан кетиш нияти йўқлигини айтди. Жошуа Sky Sports телеканали билан бўлган интервьюда олти нафар боксчидан иборат рўйхатни маълум қилди.
Жошуа ушбу рўйхатга Тайсон Фьюри, Деонтей Уайлдер, Жаррел Миллер, Олександр Усик, Луис Ортис ва Адам Ковнацкийларни киритди.
Жошуа 2019 йилнинг ёзида Миллер билан баҳс юритиши керак эди, бироқ Жаррел допинг текширувидан ўта олмаган. Оқибатда унинг ўрнини Энди Руис эгаллайди ва Жошуа устидан сенсацион ғалабани қўлга киритади. Фаолиятидаги илк мағлубиятдан кейин Энтони реванш жанги ўтказади ва унда Руисга имкон қолдирмайди.
Жошуа рўйхатдаги жангчилар билан ҳали тўқнаш келмаган.
Эслатиб ўтамиз, Энтони 25 июлда болгариялик боксчи Кубрат Пулевга қарши рингга чиқади.
Изоҳ (0)