АОКА ҳузуридаги штабда 20 апрель куни ўтказилган брифингда Бандлик ва меҳнат муносабатлари вазирлиги инспектори Гулруҳ Ниёзметова ижтимоий тармоқ фойдаланувчилари ва аҳоли томонидан йўлланган саволларга жавоб қайтарди. Бу ҳақда «Дарё» мухбири хабар бермоқда.
Вазирлик вакили бухоролик фуқаролардан бирининг «Карантин сабабли асосий иш жойимдан иш ҳақи сақланмаган ҳолда таътилга чиқариб юборишди. Шахсий автомобилимда ‘доставка’ билан шуғулланадиган фирмада ишлашим мумкинми? Бу иш стажига ўтадими ва меҳнат дафтарчамга ёзиладими?», — деган саволига атрофлича жавоб берди.
«Ходим карантин чора-тадбирлари белгиланган вақтда ўз ҳисобидан таътил олган бўлса, мазкур меҳнат таътили унинг муддатидан қатъий назар ходимнинг иш стажига киради. Шунингдек, ўриндошлик асосида ҳамда бир неча касбда ва лавозимда ишлаш тартиби тўғрисидаги низомга мувофиқ, ходимнинг ўзининг асосий ишини бажаришидан ташқари асосий ишидан бўш вақтида меҳнат шартномаси асосида бошқа ҳақ тўланадиган ишни бажариши мумкин. Ходимнинг илтимосига кўра, ўриндошлик асосидаги иш унинг меҳнат дафтарчасига киритилади ҳамда ишлаган даври меҳнат стажи ҳисобланади», — деди Гулруҳ Ниёзметова.
Изоҳ (0)