Фарғона вилоятида коронавирусга чалинганлар сони 97 кишига етди. Инфекцияни юқтириб олганлар орасида икки нафар ҳамшира ҳам бор, дея хабар беради «Дарё» мухбири.
2020 йил 19 апрель ҳолатига кўра, вилоятда коронавирус инфекциясини юқтириб олганлар сони 11 кишига ошган.
Коронавирусга чалиниш билан боғлиқ ҳолатларнинг 79 таси Туркиядан чартер рейс билан Фарғонага келган ва Олтиариқ туманидаги «Қизилтепа» сиҳатгоҳида карантинга олинган фуқаролар орасидан аниқланган.
Вилоят соғлиқни сақлаш бошқармаси бошлиғи Одилжон Умаровнинг вилоят телевидениеси орқали чиқишида маълум қилинишича, беморларга тиббий ёрдам кўрсатиш вақтида икки нафар ҳамшира ҳам коронавирус инфекциясини юқтириб олган.
«Ҳозирда вилоятимизда коронавирусга чалинганлар орасида ўта оғир аҳволдаги беморлар йўқ, уларнинг умумий аҳволи яхши. Барча беморларда халқаро стандартлар асосида муолажалар олиб борилмоқда. Инфекцияга чалинган икки нафар ўрта тиббиёт ходими ҳам тузалиш арафасида», — дейди вилоят соғлиқни сақлаш бошқармаси бошлиғи Одилжон Умаров.
Фарғонада шу кунгача коронавирус инфекциясига чалинган беморларнинг олти нафари бутунлай соғайиб, реабилитацияга кузатилган.
Ўзбекистонда 20 апрель соат 14:30 ҳолатига кўра, коронавирус инфекциясини юқтириб олганлар сони 1582 нафарни ташкил этмоқда. 15 мартдан буён коронавирусга чалинган беморларнинг беш нафари вафот этди, 261 нафари эса соғайиб, реабилитацияга олинган.
Изоҳ (0)