Карантин чораларига риоя қилинса, Россияда COVID-19 коронавирусини июнь ойига бориб енгиш мумкин. Бу ҳақда Москва физика-техника институти геном муҳандислиги лабораторияси раҳбари Павел Волчковга таяниб, «Коммерсантъ» хабар берди.
Волчковнинг сўзларига кўра, ҳукумат томонидан жорий этилган карантин чоралари тиббиёт ташкилотларига «нафас ростлаб олиш» учун имконият беради. Унинг фикрича, карантин камида тўрт ҳафта ёки ундан кўпроқ давом этиши керак.
«Сиз билан бизга кўп нарса боғлиқ, чунки инфекция юқтириб олган бир фуқаро ўнлаб янги касалларни келтириб чиқаради. Чин кўнгилдан умид қиламанки, амалдаги карантин чораларига риоя қиладиган бўлсак, инфекция устидан ғалабага эришамиз ва июнда касалланиш бўйича янги ҳолатлар нолга қараб кетишини кузатамиз. Бу бизнинг қўлимизда. Муҳими, барчамиз уйда ўтиришимиз керак», — дейди Волчков.
Вирусологнинг таъкидлашича, кўчаларда вирус зарралари зичлиги кам у, асосан, ёпиқ биноларда, ҳаво айланишига яхши имконият яратилмаган ва оралиқ масофага риоя қилинмаган жойларда катта хавф туғдиради.
Аввалроқ Россия бош вазири COVID-19’ни даволашда давлат рўйхатидан ўтказилмаган Хитой препаратидан фойдаланишга рухсат бергани маълум бўлганди.
Сўнгги маълумотларга кўра, Россияда коронавирус билан касалланганлар сони 37 минг кишига яқинлашиб қолган, шунингдек, мамлакатда 42 нафар ўзбекистонликда COVID-19 инфекцияси аниқланган.
Изоҳ (0)