Rossiya bosh vaziri Mixail Mishustin Milliy tibbiyot tadqiqotlari kardiologiya markaziga tibbiyot muassasalariga Xitoydan keltirilgan preparatni bepul tarqatish va undan koronavirusni davolashda foydalanish bo‘yicha topshiriq berdi. Hukumat rahbarining farmoyishi Rossiya huquqiy axborot portalida e’lon qilingan, deb xabar berdi “RBK”.
Foto: “RBK”
“Markaz preparatlarning saqlanishi va koronavirusga chalingan bemorlarni davolayotgan davlat va xususiy tashkilotlari hamda klinikalarga imtiyozli ravishda tarqatilishini ta’minlashi lozim. Preparatning nomi “Gidroksixloroxin” va u xalqaro patent olmagan, tabletka ko‘rinishida, 100 mg, 14-raqamli, jami 68 600 ta qadoqlangan, Xitoy Xalq Respublikasidan insponparvarlik yordami sifatida yuborilgan, Shanhay Farmasyutikals Co., LTD tomonidan ishlab chiqarilgan”, — deyilgan hukumat farmoyishida.
Hujjatda “Roszdravnadzor” RFning “Dori vositalari bilan muomala qilish to‘g‘risida”gi qonuniga muvofiq preparatdan samarali foydalanilish va uning bemorlarga zarar yetkazmasligi ustidan nazorat qilish lozimligi qayd etilgan.
“RBK” nashrining Rossiya sog‘liqni saqlash vazirligi axborot xizmatiga asoslanib xabar qilishicha, ushbu preparat mamlakat hududida ro‘yxatdan o‘tkazilmagan.
Dori vositalari ro‘yxatdan o‘tkazilgan davlat reyestrida 4 ta preparat gidroksixloroxin asosidagi tarkib bilan bayon etilgan. Ikkitasi shunday nomlanadi ham, qolgan ikkisi “Plakvenil” va “Immard” deb ataladi. Ushbu dori vositalari Irlandiya, Kanada, Hindiston va Rossiyada ishlab chiqariladi. Xitoy ishlab chiqaruvchilari reyestrga kiritilmagan.
“Gidroksixloroxin” bezgakka qarshi xususiyatlarga ega, shuningdek, yallig‘lanishga qarshi va immunodepressiv vosita. Rossiya sog‘liqni saqlash vazirligining COVID-19’ga qarshi kurash bo‘yicha tavsiyalarining beshinchi versiyasida ushbu preparat SARS-CoV va MERSCoV koronaviruslari keltirib chiqargan atipik pnevmoniyani davolashda ishlatilishi haqida ma’lumot berilgan. Vazirlik undan tashqari “Xloroxin”, “Lopinavir+Ritonavir”, “Azitromitsin” va boshqa interferon preparatlarni ham tavsiya qilgan.
Mavzuga doir: Rossiya, AQSh va boshqa mamlakatlar tajribasi. Koronavirusdan bezgakka qarshi dorilar yordamida davolansa bo‘ladimi?
Avvalroq Kanadalik olimlar koronavirus ko‘payishini bloklovchi preparatni topgani va bu Ebola bezgagini davolash uchun yaratilgan “Remdesivir” (RDV) dori vositasi ekani, Rossiya sog‘liqni saqlash vazirligi mamlakatda koronavirusga qarshi preparat ishlab chiqilganini e’lon qilgani, yaponiyalik olimlar koronavirus ko‘payishini to‘xtatishi mumkin bo‘lgan preparat nomini aytgani va u “Nelfinavir” preparati bo‘lib, undan OIVni davolashda boshqa shu kabi dorilar bilan birga foydalanilishi, shuningdek, O‘zbekistonda koronavirusni davolashda foydalanilayotgan preparat nomi ma’lum qilingani xususida xabarlar berilgan.
