19 апрель, якшанба куни, Ўзбекистонда коронавирус инфекциясига чалинган беморларнинг яна 20 нафари бутунлай тузалди. Соғлиқни сақлаш вазирлигидан маълум қилишларича, уларнинг 10 нафари Бухоро вилояти ихтисослашган тиббиёт муассасасидан, яна 10 нафари Тошкент шаҳридаги Эпидемиология, микробиология ва юқумли касалликлари илмий-текшириш институти клиникасидан чиқарилган.
Бухоро вилояти ихтисослашган тиббиёт муассасасидан тузалиб чиққан 10 нафар беморнинг барчаси 2020 йил 25 март куни чартер рейс билан Россиядан Бухорога олиб келинган ва карантинга олинган. Коронавирус инфекцияси тасдиқлангач, вилоят ихтисослашган тиббиёт муассасасига жойлаштирилган. Соғайганларнинг 9 нафари эркак, 1 нафари аёл. Уларнинг 3 нафари Самарқанд вилоятидан, 2 нафари Қашқадарё вилоятидан, Тошкент шаҳри, Навоий, Сурхондарё, Жиззах ва Андижон вилоятларидан эса 1 нафардан. Улар орасида энг ёши каттаси 55 ёшда бўлса, энг ёши кичиги 19 ёшда.
Улар вилоят соғлиқни сақлаш бошқармаси масъуллари иштирокида реабилитацияга кузатилган.
Тошкент шаҳридаги Эпидемиология, микробиология ва юқумли касалликлари илмий-текшириш институти клиникасида тузалиб чиққан 10 нафар беморнинг 6 нафари Тошкент шаҳридан, 3 нафари Тошкент вилоятидан ва 1 нафари Қашқадарё вилоятидан.
Улардан 7 нафари коронавирус инфекциясига чалинганлар билан мулоқотда бўлиб, юқтириб олган. Шунингдек, уларнинг 2 нафари Россиядан Тошкентга келган ва «Сокол» оромгоҳида карантинга олинган, яна 1 нафари эса Москва—Тошкент йўналишида чартер рейс орқали келгач, Юқори Чирчиқ туманидаги карантин марказига жойлаштирилган.
Уларда коронавирус инфекцияси аниқлангач, Эпидемиология, микробиология ва юқумли касалликлари илмий-текшириш институти клиникасида даволанишни бошлаган. Беморларнинг 6 нафари эркак, 4 нафари аёллардир. Улар орасида энг ёши каттаси 61 ёшда бўлса, энг ёши кичиги 13 ёшда.
Улар Соғлиқни сақлаш вазирлиги масъуллари иштирокида Республика ихтисослаштирилган терапия ва тиббий реабилитация илмий-амалий тиббиёт марказига кузатилди.
Шундай қилиб, 19 апрель соат 16:06 ҳолатига кўра Ўзбекистон бўйича коронавирусдан буткул соғайганлар сони 214 кишига етди.
18 апрель куни Ўзбекистон бўйлаб коронавирус инфекциясидан бутунлай соғайган беморлар сони аввалги кунларга нисбатан энг юқори кўрсаткични қайд этган ҳолда 38 нафарга етиб, жами 194 нафарни ташкил этгани хабар берилган эди.
Ўзбекистонда 19 апрель соат 10:00 ҳолатига кўра, коронавирус инфекциясини юқтириб олганлар сони 1495 нафарни ташкил этмоқда, ўтган вақт давомида касалликка чалинган тўрт бемор вафот этган.
Бундан ташқари, сўнгги маълумотларга кўра, хориждаги 73 нафар ўзбекистонликда ҳам коронавирус аниқланган, уларнинг камида тўрт нафари вафот этган. Вафот этганларнинг уч нафари АҚШда, бир нафари эса Россияда бўлиб турган эди.
Изоҳ (0)