Россияда бир сутка ичида коронавирусга чалиниш бўйича 6060 та ҳолат қайд этилди. 48 киши касалликдан вафот этган

Россияда 78 та федерал ҳудудда бир сутка ичида 6060 нафар киши COVID-19 коронавирусини юқтириб олди. Бу ҳақда касалликка қарши кураш бўйича тезкор штаб хабар берди.

Россияда коронавирус билан касалланганларнинг умумий сони 42 853 нафарга етган. Шу тариқа охирги беш кун ичида коронавирусга чалинганлар икки баравар кўпайган, ушбу давр оралиғида 20 мингдан кўпроқ кишида COVID-19 қайд этилган.

Касалланганлар сони бўйича Москва шаҳри етакчилик қилмоқда, охирги бир сутка ичида бу ерда 3750 кишида коронавирус аниқланган. Уларнинг қарийб 85 фоиз қисмини 65 ёшдан кичик бўлган фуқаролар ташкил қилади. Пандемия бошланганидан бери шаҳарда жами 24 323 та касалланиш ҳолати рўйхатга олинган.

Москва вилоятида бир сутка ичида 709 та ҳолат кузатилди, Нижегород вилоятида 129 та, Санкт-Петербургда 114 та ҳолат қайд этилган. Кейинги ўринларда Архангельск вилояти (68), Мордовия Республикаси (60) ва Тульск вилояти (58) бормоқда.

Тезкор штаб маълумотларига кўра, бир сутка ичида аниқланган беморларнинг 3 фоизида касалликнинг клиник белгилари кузатилмаган.

Охирги 24 соат ичида Россияда 48 нафар фуқаро коронавирусдан вафот этган, Москванинг ўзида 28 киши COVID-19’дан ўлган. Пойтахтда вафот этганларнинг ёши — 30 дан 93 гача, тезкор штаб маълумоти бўйича вафот этганларнинг аксариятида гипертония, сурункали бронхит ва қандли диабет кузатилган.Москва вилоятида 9 нафар, Пенза вилоятида 3 нафар, Бошқирдистонда 2 нафар, Ингушетия, Краснодар ўлкаси, Липецк, Мурманск, Новосибирск каби вилоятларда ва Ставропольск ўлкасида биттадан бемор вафот этган. Мамлакатда пандемия бошланганидан бери коронавирусдан вафот этганлар сони 361 нафарга етган.

Коронавирусдан тузалганлар сони эса 3291 нафарга етган. Бир сутка ичида 234 нафар бемор инфекциядан фориғ бўлган.

Жонс Ҳопкинс университети берган статистик маълумотларга кўра, бутун дунёда COVID-19 билан касалланганлар сони 2,3 миллиондан ошиб кетган, 160,9 минг киши касаллик оқибатида ҳаётдан кўз юмган.