Жанубий Кореяда февраль ойининг ўрталаридан буён биринчи марта бир сутка ичида коронавирус билан касалланиш бўйича энг паст кўрсаткич қайд этилди — саккиз кишида COVID-19 аниқланган. Бу мамлакат Соғлиқни сақлаш вазирлиги ҳузуридаги Касалликлар назорати ва профилактикаси маркази (KCDC) хабар берди.
Маълумотларга кўра, коронавирус билан касалланганларнинг беш нафари четдан кириб келган бўлиб, уч нафари мамлакат ичида юқтириб олган. Иккита ҳолат Сеулда ва яна иккитаси Тэгу шаҳарида аниқланган бўлса, Инчхон ва Кёнсан-Пукто провинциясида биттадан ҳолат қайд этилган. Қолган иккитаси эса карантин текшируви вақтида аниқланган.
Бутун мамлакат бўйлаб коронавирус билан касалланганлар сони 10 661 кишига етди, яна 105 киши даволанишга муваффақ бўлган.
Аввалроқ Жанубий Корея эпидемиологик хавф даражасини энг юқорига кўтарган эди. 19 апрелга қадар аҳолига сабабсиз кўчага чиқиш тақиқланган, спорт, кўнгилочар ва диний муассасалар ёпилган.
Аввалроқ Жанубий Кореяда касалланиш ҳолатлари камаяётгани ҳақида хабар берилган эди. Кейинроқ мамлакатда коронавирусдан тузалган ўнлаб инсонларда яна COVID-19 аниқлангани маълум бўлди.
Изоҳ (0)