АҚШнинг давлат қарзи ва Америка корпорацияларининг қарзлари коронавирус туфайли 2020 йилда рекорд даражага етиши мумкин, деб ёзмоқда The Washington Post.
Қайд этилишича, мамлакатда бюджет тақчиллиги қарийб 4 триллион долларгача кўтарилади. Бундай кўрсаткич сўнгги бор 1945 йилда қайд этилган.
Хусусий секторда ҳам шундай вазият кузатилмоқда. Сўнгги йилларда кредитларга ҳаддан ташқари ишонган кўплаб йирик корпорациялар энди инқироз даврида қарзларини кўпайтирмоқда. Мутахассисларнинг фикрича, муайян босқичда ушбу компаниялар ёки кредитларни қопламаслик ёки ходимлар сонини қисқартиришни танлашига тўғри келади.
Шунингдек, қайд этилишича, АҚШда ишсизлик даражаси Буюк тушкунлик даври (1929—1933 йиллар)дан буён кузатилмаган даражага етди.
Нашр томонидан сўроқ қилинган иқтисодчиларнинг фикрига кўра, бундай қарздорлик даражаси иқтисодиётда қайтарилмас ўзгаришларга олиб келади ва бу пандемия тугаганидан кейин ҳам салбий таъсир кўрсатишда давом этади.Эслатиб ўтамиз, АҚШда коронавирус тарқалиши билан боғлиқ дунёдаги энг мураккаб вазият юзага келган. Жонс Ҳопкинс университети маълумотларига кўра, мамлакатда коронавирусга чалинганлар сони 735 минг кишидан ошган.
Изоҳ (0)