19 апрель куни Ахборот ва оммавий коммуникациялар агентлиги ҳузурида ташкил этилган штабда бўлиб ўтган брифингда нархларни асоссиз равишда ошириш ва манипуляция қилишга ҳаракат қилинган ҳолатлар бўйича маълумот берилди. Бу ҳақда «Дарё» мухбири хабар берди.
Скриншот: Uzreport
Бош прокуратура ҳузуридаги Иқтисодий жиноятларга қарши курашиш департаменти бўлим бошлиғи Фарҳод Очилов ўтган даврда тегишли идоралар билан ҳамкорликда нархларни асоссиз ошириш, ажиотаж талабни вужудга келтириш ва карантин талабларини бузишга қарши курашишга қаратилган тадбирларда 1 095 та ҳолатда жами 2,33 миллиард сўмлик маҳсулотни қиммат сотиш аниқланганини айтиб ўтди.
Ҳуқуқбузарликларнинг 313 таси картошкани, 25 таси сабзи, 49 таси пиёз, 27 таси ун, 42 таси ёғ, 34 таси гўшт ва 364 таси бошқа маҳсулотларни қиммат сотиш билан боғлиқ ҳолатлар бўлиб, ҳар бир ҳуқуқбузарга нисбатан қатъий чоралар кўрилгани таъкидланди.
Шунингдек, айрим деҳқон бозорлари мансабдор шахслари мансаб ваколатидан ғаразли ва паст ниятларда фойдаланиб, ноқонуний равишда бойлик орттиришга ҳаракат қилганлиги аниқланиб, уларга нисбатан кескин чоралар кўрилгани хабар қилинди.
Жумладан, Навоий шаҳридаги Саҳоват деҳқон бозори ва “Элга xизмат” МЧЖ мансабдор шахслари 2019—2020 йил қиш—баҳор мавсумида аҳоли эҳтиёжи учун қишлоқ хўжалик маҳсулотлари захирасини яратиш учун ажратилган пуллардан 448,4 миллион сўмини нақдлаштириб, захирани яратмасдан ўзлаштирганликлари аниқланган.
Ушбу деҳқон бозори мансабдор шахслари марказлаштирилган тартибда сотилаётган импорт картошкадан 77,2 тоннаси ёлланма харидорлар орқали арзон нархларда, яъни 2 700—3 500 сўмдан сотиб олишиб, назорат қилинмайдиган фойда олишни кўзлаб, 4500—5000 сўмдан қиммат нархларда қайта сотишга уринган пайтда жиноят устига қўлга олингани маълум қилинди. Ҳозирда жиноят иши қўзғатилиб, улар тергов олдида жавоб бераётгани айтилди.
Шунингдек, Самарқанд шаҳар Сиёб деҳқон бозорига қарашли Кўтара бозор филиали ҳудудида ўтказилган назорат тадбирларида фуқаро Маҳмудов давлат рўйхатидан ўтмасдан, қарийб 7 тонна картошка маҳсулотини бозорда қиммат нархда (4 500 сўмдан) сотиш ва нархларни манипуляция қилишга уринганлиги аниқланиб, унга нисбатан тегишли тартибда чора кўрилиши ҳамда маҳсулотларнинг мусодара қилиниб, ярмаркалар орқали аҳолига арзон нархда сотилиши таъминлангани билдирилди.
Товар-хом ашё биржасидаги савдолар ҳам қатъий назоратда эканлиги таъкидланиб, жумладан, «Когондонмаҳсулотлари» корхонаси томонидан савдога қўйилган ун маҳсулотлари 2400—2500 сўмдан сотилаётган бир вақтда Навоий вилоятида фаолият олиб бораётган айрим брокерлар буюртмачисиз ҳаракатланиб, нархларни манипуляция қилиш мақсадида уннинг нархини 2800 сўмгача оширганлик ҳолати аниқлангани, ҳолат юзасидан суриштирув ишлари олиб борилаётгани таъкидланди.
Эслатиб ўтамиз, Ўзбекистонда март ойида инфляция 1,3 фоизни ташкил этгани хабар қилинган эди. Шунингдек, Давлат солиқ қўмитаси коронавирус сабаб нархларнинг сунъий оширилгани юзасидан 1600 дан зиёд шикоятлар келиб тушганини билдирган.
