Хитойнинг Россиядаги элчиси Чжан Ханхуэй коронавируснинг манбаи Хитойда эканлигига шубҳа қилди. Бу ҳақда «ТАСС» хабар берди.
«COVID-19 биринчи марта Уханда пайдо бўлган бўлса ҳам, унинг манбаи Уханда эканлиги аниқ эмас», — деган хитойлик дипломат. Унинг қўшимча қилишича, баъзи кишилар ёмон фикр билан вирусни Хитой коронавируси, Ухань коронавируси деб атамоқда.
Элчининг қайд этишича, вирус манбаини аниқлаш илмий ва ижтимоий масала ҳисобланади. Дипломат Ухань вирус олиб борилган жойлардан бири бўлгани ҳақидаги қарашлар борасида гапирган. Элчи мисол сифатида февраль ойида Японияда юз берган вазиятни келтирган, ўшанда оилавий жуфтлик Гавайида коронавирусни юқтиргани тахмин қилинган. Бундан ташқари, элчи март ойида Вьетнамда бўлган ва коронавирус исканжасида қолган АҚШнинг Theodore Roosevelt авиаташувчи кемасини эслаб ўтган.
Сўнгги бир суткада Хитойда коронавирусга чалиниш билан боғлиқ 26 та янги ҳолат қайд этилган, бу бир кун олдингига қараганда 46 та кам ҳисобланади. Хитойда коронавирусга чалинганларнинг умумий сони 82300 кишидан ошган, бироқ касалликнинг жиддий аломатларсиз ўтганлари ҳисобга қўшилмаяпти.
Шунингдек, Хитой Ухандаги коронавирус қурбонлари сонига аниқлик киритди. Вафот этганлар сони 1290 кишига кўп бўлиб чиқди ва 3869 кишига етган,
Аввалроқ Хитой Ташқи ишлар вазирлигининг расмий вакили Чжао Лицзян коронавирус сунъий усулда тайёрланганлиги ҳақидаги айбловга жавоб қайтарган ва АҚШ президенти Дональд Трампнинг сайловолди штаби томонидан қилинган баёнотини қоралаганди.
Эслатиб ўтамиз, COVID-19 коронавирус инфекцияси дастлаб 2019 йилнинг охирида Хитойнинг Ухань шаҳрида қайд этилганди. 2020 йилнинг 11 март куни Жаҳон соғлиқни сақлаш ташкилоти коронавирусни пандемия деб эълон қилганди.
Изоҳ (0)