Беларусдаги мактабларда ўқув йили давом эттирилади, ўқувчилар таълимни бевосита ўқув муассасасига борган ҳолда олиши мумкин. Бу ҳақда БЕЛTА агентлиги хабар қилган.
Ўқувчиларнинг таълим жараёни 20 апрелдан қайта бошланади. Маориф вазири Игор Карпенко ўқув йили якуни бошқа муддатга кўчирилмаслиги ва мактаб ўқувчилари таълимни белгиланган муддатларда якунлашини билдирган.
Вазирнинг сўзларига кўра ўқувчиларнинг 40 фоизи мактабларга бориб, таълимни давом эттиришни режалаштирган, чекка қишлоқ ҳудудларида бу борадаги фоиз кўрсаткичи нисбатан юқори.
«Фуқароларда, хусусан, ота-оналарда ўз боласини мактабга жўнатиш ёки аксинча уйда олиб ўтириш борасида саволлар пайдо бўлиши табиий. Болани юбориш ёки юбормаслик ота-оналарнинг ихтиёрида қолган масала. Биз ҳеч кимни мажбурламаймиз», — дея таъкидлаган Карпенко.
Аввалроқ Беларусь президенти Александр Лукашенко аста-секин ва хотиржам тарзда мактабларда келаси ҳафтадан ўқув жараёнини қайта бошлаш бўйича топшириқ берганди. Лукашенконинг таъкидлашича, мактабларда таълим олиши учун имконият борми, демак, мамлакатдаги эпидемиологик вазият барқарор ва ўқувчилар таълимни давом эттириши мумкин.
Март ойи охирида Лукашенко Беларусда COVID-19 инфекцияси келтириб чиқараётган касалликлар мавжуд экани, бироқ карантин тартиби жорий қилинмаслигини маълум қилганди.
Мавзуга доир:
- Беларусда коронавирусга чалинган 29 киши вафот этди. Лукашенко уларнинг ўлимига коронавирус сабаб бўлмаганини айтди
- Ўзбекистон Беларусга коронавирусга қарши курашда фойдаланиш учун инсонпарварлик ёрдамини жўнатди
- Беларусда коронавирус билан касалланган тиббиёт ходимлари сони 301 нафарга етди
- «Бечора, дош бера олмади». Лукашенко Беларусда коронавирусдан вафот этган биринчи бемор ҳақида
Изоҳ (0)