Ижтимоий тармоқларда фуқаролар томонидан умумтаълим муассасаларининг 5—11-синф ўқувчилари учун босқичли назорат ва якуний давлат имтиҳонларини ўтказиш ёки бекор қилиш бўйича саволлар берилмоқда.
Халқ таълими вазирлиги мабуот хизматининг хабар беришича, тегишли давлат ташкилотлари билан биргаликда 5—11-синф ўқувчилари учун босқичли назорат ва якуний давлат имтиҳонларини ўтказиш йўллари ёки бекор қилиш масаласи муҳокама қилинмоқда. Ишлаб чиқилган таклифлар махсус ҳукумат комиссияси муҳокамасига тақдим этилади.
Вазирлик махсус ҳукумат комиссиясининг бу масаладаги қарорини ўз каналлари орқали маълум қилишини билдирган ва ўқувчиларни «Онлайн мактаб» каналларида намойиш этилаётган телевизион дарслар орқали билим олишда давом эттиришга чақирган.
Эслатиб ўтамиз, Ўзбекистонда коронавирус аниқланганидан кейин барча таълим муассасалари ёпилган. Мактаб ўқувчилари учун бир қатор телеканалларда видеодарслар эфирга узатилмоқда.
Карантиннинг қачон тугаши эса номаълум. У Республика махсус комиссияси қарорига кўра амалга оширилади. Бош вазир ўринбосари Жамшид Қўчқоров Ўзбекистонда карантин билан боғлиқ чеклов чоралари май ойида ҳам давом этиши эҳтимоли анча катталигини айтганди.
Изоҳ (0)