Ijtimoiy tarmoqlarda fuqarolar tomonidan umumta’lim muassasalarining 5—11-sinf o‘quvchilari uchun bosqichli nazorat va yakuniy davlat imtihonlarini o‘tkazish yoki bekor qilish bo‘yicha savollar berilmoqda.
Xalq ta’limi vazirligi mabuot xizmatining xabar berishicha, tegishli davlat tashkilotlari bilan birgalikda 5—11-sinf o‘quvchilari uchun bosqichli nazorat va yakuniy davlat imtihonlarini o‘tkazish yo‘llari yoki bekor qilish masalasi muhokama qilinmoqda. Ishlab chiqilgan takliflar maxsus hukumat komissiyasi muhokamasiga taqdim etiladi.
Vazirlik maxsus hukumat komissiyasining bu masaladagi qarorini o‘z kanallari orqali ma’lum qilishini bildirgan va o‘quvchilarni “Onlayn maktab” kanallarida namoyish etilayotgan televizion darslar orqali bilim olishda davom ettirishga chaqirgan.
Eslatib o‘tamiz, O‘zbekistonda koronavirus aniqlanganidan keyin barcha ta’lim muassasalari yopilgan. Maktab o‘quvchilari uchun bir qator telekanallarda videodarslar efirga uzatilmoqda.
Karantinning qachon tugashi esa noma’lum. U Respublika maxsus komissiyasi qaroriga ko‘ra amalga oshiriladi. Bosh vazir o‘rinbosari Jamshid Qo‘chqorov O‘zbekistonda karantin bilan bog‘liq cheklov choralari may oyida ham davom etishi ehtimoli ancha kattaligini aytgandi.
Izoh (0)