Бош вазир ўринбосари — иқтисодий ривожланиш ва камбағалликни қисқартириш вазири Жамшид Қўчқоров ҳамда молия вазири Тимур Ишметов иқтисодчи Бекзод Ҳошимов билан суҳбат давомида Ўзбекистон ҳукумати коронавирус пандемияси шароитида аҳолига қандай моддий кўмак бериш вариантларини кўриб чиқаётганини сўзлаб берди.
Молия вазири Тимур Ишметов ҳозирги инқироз ҳолати алоҳида бир шахс ёки ҳукуматнинг айби билан юзага келмаганини таъкидлаб, дунёнинг кўплаб давлатлари инсонлар ҳаётини сақлаб қолиш учун «иқтисодиётни тўхтатишга» мажбур бўлаётганини билдирди.
«15 март куни (Ўзбекистонда коронавирус билан касалланган илк бемор қайд этилганида) ўтказилган йиғилишда ушбу масала кўтарилди. Ўша вақтда ўзим ҳам буни қачон амалга ошириш керак, деган саволга жавоб бера олмадим. 15 март куни биз иқтисодиётни қанчага тўхтатишимизни, қандай чекловларгача боришимизни билмас эди. Кундан кунга вазиятдан келиб чиқиб, уни қатъийлаштира бордик», — дейди молия вазири.
Ишметовнинг таъкидлашича, давлатнинг асосий мақсади — аҳолини ҳимоя қилиш ва қўллаб-қувватлаш. Бу Президентнинг ота-оналарга бериладиган нафақа ва бошқа инқирозга қарши чораларига оид иккита фармонида ҳам ўз аксини топди. Шунингдек, банкларга корхоналар ўз ишчиларга иш ҳақини тўлаши учун кредитлар билан таъминланишини ташкил этиш топширилди.
«Биз карантин сабаб уйда қолаётган аҳолига моддий ёрдам кўратиш зарурлиги тўғрисидаги фикрга аллақачон келиб бўлганмиз. Ҳа, бунинг бюджетга таъсирини ҳам ҳисоб-китоб қилиш керак, бироқ бу иккинчи даражали масала. Биринчи навбатда — ижтимоий масала», — дейди Тимур Ишметов.
Молия вазирининг таъкидлашича, ёрдам пулларини ҳар бир оилага тарқатиш керак.
«Ўйлашимча, ушбу пулларни одамларнинг банкдаги ҳисоб рақамига, яъни пластик картасига ташлаб бериш керак. Бошқа йўлни кўрмаяпмиз. Иккинчидан, бир оила принципига асосланиш керак. Яъни пулларни алоҳида шахсга эмас, оилага унинг катталигидан келиб чиқиб тарқатиш лозим. Ишсизлар ва даромадидан айрилганларнинг асосий қисми хусусий секторда, чунки давлат сектори маблағ олишни давом этмоқда. Банк картаси бўлмаса, уни очиш ва ўшанинг ичига пул ташлаб бериш керак», — дейди молия вазири.
Изоҳ (0)