Тошкент шаҳрида карантин сабаб бу муддат ўтганидан сўнг ишсиз ёшлар сони 3 баробарга кўпайиши прогноз қилинмоқда. Бу ҳақда пойтахт ҳокимининг ёшлар сиёсати, ижтимоий ривожлантириш ва маънавий-маърифий масалалар бўйича ўринбосари иштирокидаги йиғилишда маълум қилинди.
Қайд этилишича, Президентнинг 5 та муҳим ташаббуси ижросини таъминлаш ва шу орқали истеъдодли, изланувчан ёшларни рағбатлантириш мақсадида яқин орада онлайн танловлар платформаси ишга туширилади.
Шу сабаб ҳозирда шаҳар ва туман ҳокимликлари мутасаддилари бошқа қатор соҳалар раҳабарлари билан биргаликда уларни IT йўналишидаги тадбиркорликка жалб этиш, кўникмаларини ривожлантириш, секторлар билан юзага келувчи муаммолар ечими устида ишлаётганликлари ҳам айтиб ўтилган.
Карантин даврида таълим жараёнида узилиш бўлмаслиги учун ўқувчиларни онлайн ўқитаётган пойтахтдаги барча таълим муассасаларининг педагоглари Тошкент шаҳар ҳокимияти томонидан рағбатлантирилиши маълум қилинган.
Шу билан бирга, карантин тугаши билан пойтахтдаги боғча ёшидаги болаларни мактабгача таълим билан тўлиқ қамраб олишни 93 фоиздан 100 фоизга кўтариш ҳамда 6 ёшли болаларни (100 фоиз) мактабга тайёрлаш тизимини жорий қилиш масаласи ҳам муҳокама қилинган. Шунингдек, барча мактабгача таълим ташкилотлари, умумий ўрта таълим муассалари, спорт ва мусиқа мактабларида такрорий, яъни иккинчи маротаба дезинфекция тадбирларини ўтказиш ва тўлиқ тугатиш билан боғлиқ ташкилий масалалар кўриб чиқилиб, мутасаддиларга тегишли топшириқлар берилган.
Эслатиб ўтамиз, Ўзбекистонда коронавирус аниқланганидан кейин барча таълим муассасалари ёпилган. Мактаб ўқувчилари ва боғча тарбияланувчилари учун бир қатор телеканалларда видеодарслар эфирга узатилмоқда.
Карантиннинг қачон тугаши эса номаълум. У Республика махсус комиссияси қарорига кўра амалга оширилади. Бош вазир ўринбосари Жамшид Қўчқоров Ўзбекистонда карантин билан боғлиқ чеклов чоралари май ойида ҳам давом этиши эҳтимоли анча катталигини айтганди.
Аввалроқ Шерзод Шерматов карантин вақтида интернет орқали қонуний пул топиш мумкинлигини айтиб, ёшларни уйда вақтини бекор ўтказмай дарсларини қилиб, чет тиллари ва АКТни ўрганишга чақиргани ҳақида хабар берилган эди.
Изоҳ (0)