ИИВ матбуот хизматининг маълум қилишича, Ўзбекистонда карантин қоидалари ва санитария чекловларига риоя қилиш юзасидан тушунтириш ишлари олиб борилишига қарамай ҳали ҳам бунга амал қилмаётганлар аниқланмоқда.
Хусусан, 17 апрель куни Самарқанд вилоятининг Булунғур туманида яшовчи 32 ёшли А.А. карантин қоидаларига амал қилмасдан туғилган кун тадбири ташкил қилиб, уйига 11 нафар фуқарони йиғиб ўтирганлиги аниқланган.
Шунингдек, Жиззах шаҳар Шароф Рашидов кўчасида яшовчи 30 ёшли аёл Г.Н. карантин қоидаларини бузиб, уйида туғилган кунини нишонлаш учун 4 нафар таниши билан йиғин ўтказаётганлиги аниқланган.
Ҳар икки қоидабузарлар Маъмурий жавобгарлик тўғрисидаги кодекснинг 54-моддаси (Эпидемияларга қарши кураш қоидаларини бузиш)га асосан жавобгарликка тортилган.
Аввалроқ Бухорода карантин пайтида яширин фаолият кўрсатган чилимхона борлиги аниқлангани, Жиззахдаги караоке-барда карантинга қарамай мижозлар қабул қилингани, Навоийда карантин вақтида ўз уйини дискотекага айлантирган ёшлар жаримага тортилгани ҳақида хабар берилган эди. Қашқадарёда эса шифокорлар оиласи карантин қоидаларига зид равишда тўй ўтказган.
Изоҳ (0)