Ўзбекистон Республикаси Марказий банки Telegram’даги расмий канали орқали аҳолидан келиб тушган саволларга жавоб берди. Жумладан, доллар сотиб олишда чекловлар пайдо бўлгани ҳақидаги долзарб савол юзасидан расмий изоҳ берди.
«Доллар сотиб олишда чеклов борми? Айтишларича, одамлар банкка келиб доллар учун навбатда туришмоқда. Афтидан, қўлида жамғармаси борлар сўмнинг қадрсизланиши, доллар курси ошиб кетишидан хавотирда. Улар орасида валюта олди-сотдисида чекловлар бўлишидан ҳадиксираётганлар ҳам бор», – дея берилган саволга Марказий банк қуйидагича жавоб қайтарди:
«Бугунги кунда жисмоний шахслар томонидан тижорат банкларидан чет эл валютасини сотиб олиш ёки сотиш бўйича ҳеч қандай чекловлар ёки тўсиқлар ўрнатилмаган. Шунингдек, келгусида ҳам жисмоний шахсларга тижорат банклари томонидан чет эл валютасини сотиш ва сотиб олиш бўйича ҳеч қандай чекловлар ўрнатилмайди.
Миллий валюта курси валюта бозорида шаклланадиган талаб ва таклифнинг жорий даражаси асосида ўзгаради. Курснинг қадри ошиши ёки пасайиши иқтисодиётда ва ташқи шароитларда рўй берадиган фундаментал омиллар билан боғлиқ бўлади.
Бугунги кунда миллий валютадаги муддатли депозитлар бўйича банклар томонидан таклиф этилаётган фоиз ставкалари ўртача 20-21 фоиз атрофида шаклланган. АҚШ доллари курсининг йил бошидан 5-6 фоизга ошганлигини инобатга олиб ҳисоблаганда ҳам миллий валютадаги депозитларнинг иқтисодий жиҳатдан афзаллигини кўриш мумкин.
Шу нуқтаи назардан инфляциянинг келгусида пасайиб бориши шароитида миллий валютадаги депозитлар жозибадорлиги ва улар бўйича ижобий реал фоиз ставкалари сақланиб қолади», – дея мазкур саволга жавоб қайтарга Марказий банк ахборот хизмати.
Эслатиб ўтамиз, 14 апрелда Ўзбекистон банкларида доллар 9850 сўмгача кўтарилган, кун якунида эса 1 АҚШ долларининг қиймати 10 минг сўмдан ошганди, 15 апрелда Ўзбекистонда долларнинг расмий курси 10,1 минг сўмдан ошди.
Изоҳ (0)