Ўзбекистон Соғлиқни сақлаш вазирлиги ҳузуридаги Вабо, карантинли ва ўта хавфли инфекциялар профилактикаси республика марказининг лаборатория мудири Маъруфжон Мадаминов нима учун Тожикистонда ҳозиргача коронавирус аниқланмганига изоҳ берди. Бу борадаги фикрларини эксперт Sputnik нашрига маълум қилган.
Мадаминовнинг сўзларига кўра, ўз вақтида кўрилган чоралар сабабли Тожикистонда шу вақтга қадар коронавирус қайд этилмаган. Унинг фикрича, Тожикистон ҳукумати одамларнинг транспортда ҳаракатланиши бўйича чеклов тадбирларини жуда эрта амалга оширди.
Мадаминовнинг қайд этишича, Тожикистон раҳбарияти бу борада ҳеч нарсани яширмаяпти. Унинг таъкидлашича, мамлакат воқеаларнинг ҳар қандай ўзгаришига тайёр бўлиши керак.
Мадаминов Ўзбекистон бўйича ҳам ўз фикрини билдирган. Унинг сўзларига кўра, коронавирус ЖССТ томонидан пандемия деб эълон қилинишидан бир ярим ой олдин Ўзбекистон инфекциянинг чегара орқали мамлакат ҳудудига кириб келишининг олдини олган.
Аввалроқ Тожикистонда карантинда бўлган уч киши вафот этган эди. Тожикистон коронавирус хавфи сабабли хорижликларнинг мамлакатга кириш-чиқишини вақтинчалик тақиқлаганди.
Эслатиб ўтамиз, Ўзбекистон ва Тожикистон раҳбарлари коронавирус билан боғлиқ вазият юзасидан икки марта телефон орқали мулоқот қилганди. Ўзбекистон Тожикистонга ун ва антисептиклардан иборат 18 вагон гуманитар ёрдам юборди
Изоҳ (0)