Коронавирус пандемияси туфайли Путин ғалабанинг 75 йиллигини нишонлаш билан боғлиқ барча тадбирларни бекор қилди. Бу ҳақда Россия президенти Хавфсизлик кенгаши билан йиғилишда маълум қилган.
«Ҳозир олдимизда қийин танлов турибди. 9 май санаси ҳам, ҳар бир кишининг ҳаёти ҳам биз учун қадрлидир», — деган Путин.
«9 май парадига тайёрланиш ҳозирдан бошланиши керак. Бироқ эпидемия билан боғлиқ хавф-хатарлар ҳали жуда юқори ва бу менга парад ва бошқа оммавий тадбирларга тайёргарлик кўришни бошлаш ҳуқуқини бермайди», — деб таъкидлаган у.
Президентнинг сўзларига кўра, барча тантанали тадбирлар, жумладан, Ғалаба паради ва Ўлмас полк юриши кейинчалик 2020 йилда ўтказилади. Ўтказиш кечиктирилгани билан Ғалаба кунини 9 майда нишонлаш давом этади ва бу сана ўзгартирилмайди.
Маълумот учун, бу йилги ҳарбий парадда Шавкат Мирзиёев ҳам иштирок этиши кутилаётганди.
Эслатиб ўтамиз, Россияда сўнгги бир суткада коронавирусга чалиниш бўйича 3388 та янги ҳолат қайд этилди. Касалланганларнинг умумий сони 24 490 кишига етди, 232 нафар бемор вафот этди, 2304 киши тузалди. Коронавирус мамлакатнинг 84 та ҳудудида аниқланган. Коронавирус қайд этилмаган ягона ҳудуд Олтой Республикаси бўлиб қолмоқда.
Изоҳ (0)