Россия ядровий синовларни ўтказишнинг тақиқланиши тўғрисидаги ўз мажбуриятларини бузгани йўқ. Бу ҳақда Россия ташқи ишлар вазири ўринбосари Сергей Рябковга таяниб, «Коммерсантъ» хабар берди.
Рябков АҚШ Давлат департаментининг 2019 йил учун дунё мамлакатлари қуролланишининг назорати борасидаги келишувларга риоя қилиши тўғрисидаги ҳисоботига изоҳ берган. Ушбу ҳисоботда Россия ядровий қуролни синовдан ўтказгани ёзилган.
«Вашингтон томонидан бизнинг манзилимизга ярим йилдан бери билдирилаётган таъна-дашномларга кўра, биз ядровий қуроллар синови тўғрисидаги ўзимизнинг мораторийга тўлиқ риоя қилмаётган эканмиз. Яна бир бор такрорлаймиз, биз ядровий синовларга қўйилган бир томонлама мораторийимиз ҳамда бизнинг ‘Ядровий синовларни ҳар томонлама тақиқлаш тўғрисида’ги битимнинг ратификациясида кўрсатилган мажбуриятларимиздан четга чиққанимиз йўқ», — дейди вазир ўринбосари.
Шу билан бирга, Рябковнинг таъкидлашич, АҚШ «кўплаб аломатлар билан», хусусан, Америка ихтисослашган тузилмаларининг мақолаларига кўра, «юқори шай ҳолатда турган Невада полигонида синовларни ўтказиш йўлида турган бўлиши мумкин». У Вашингтонни жаҳон ҳамжамиятига ядровий синовлар борасида ёлғон маълумот тарқатмасликка чақирди.
Аввалроқ АҚШ Россия 15 апрель куни сунъий йўлдошни уриб туширишга қодир ракетани синовдан ўтказганини маълум қилганди.
Изоҳ (0)