Зафар Ҳошимов Ўзбекистонда тадбиркорликни тартибга солувчи ҳужжатларни соддалаштириш кераклигини айтди

Ўзбекистоннинг турли ҳудудларида фаолият олиб борувчи «Korzinka.uz» супермаркетлар тармоғи асосчиси ва раҳбари Зафар Ҳошимов мамлакатда тадбиркорликни тартибга солувчи ҳужжатларни соддалаштириш кераклигини айтди. Тадбиркор бу ҳақда «MFaktor» лойиҳасига берган интервьюсида гапирган.

Зафар Ҳошимов мамлакатда тадбиркорликни ривожлантириш масалаларига тўхталиб, бюрократия ҳақида гапирган.

«Тадбиркорликни тартибга солувчи турли қонун ва қонуности ҳужжатлари бор. Ҳозир мутасадди давлат ташкилотлари уларни иложи борича соддалаштириши керак. Масалан, савдо, сертификатлаштириш қоидалари ва бошқалар. Буларнинг ҳаммаси — бизнес учун транзакцион харажатларни оширадиган нарсалар. Транзакцион харажатларни пасайтириш устида давлат муассасалари, депутатлар, кенгашлар ишласа, жуда ҳам яхши бўларди.

Бу нарса деярли катта пул талаб қилмайди, лекин ҳақиқатан ҳам давлатга фойдаси, ё зарари бўлмаган баъзи расмиятчилик, ҳисоботлар бор. Шу нарсаларга ҳозир барҳам берсак, мақсадга мувофиқ», — деб таъкидлаган Зафар Ҳошимов.

Унинг қайд этишича, бизнесни юритиш соҳасидаги кўплаб тизимларни электронлаштириш керак.

Хусусан, тадбиркорнинг фикрича, солиқ ҳисоботини онлайн бериш мумкин. Бундан ташқари ҳар куни бериладиган қоғоз ишончнома, юк хатини электронлаштириш ва электронлаштирилган тизимларга ўтказиш зарур.

Зафар Ҳошимов Жаҳон савдо ташкилотига киришни тадбиркорлар учун кенг имконият деб ҳисоблайди. Унинг фикрича, фавқулодда ҳолатдан фойдаланиб, Жаҳон савдо ташкилотига тезроқ кириш лозим.

Тадбиркорнинг фикрича, сертификатлаштириш тизимида енгилликлар берилиши керак.

«Сертификатлаштириш борасида анчадан бери шикоятларим бор. Қайси маънода? Давлат шу маҳсулотнинг зарарли ёки зарарсизлигини етказиб берса бўлади. Унинг сифатини бозор аниқлайди. Кимнингдир жуда сифатли нарсага пули етмаслиги мумкин. Лекин шу маҳсулот зарарсиз бўлса, бўлди. Маҳсулот зарарли бўлмаса, турли баҳоналар билан уни сертификатламаслик ва шунга ўхшаган нарсаларда енгиллик бериш керак. Бундай ўзгаришлар аҳолига ҳам, тадбиркорларга ҳам енгилликлар беради», — деди Ҳошимов.

Аввалроқ Зафар Ҳошимов Президентнинг коронавирус масаласида ўтказган видеоселекторда нималардан таъсирланганини айтган эди.