Navoiy viloyati IIB axborot xizmati Xatirchi tumanida karantin vaqtida oilaviy janjal oqibatida akaning ukaga tan jarohati yetkazganligi haqida xabar berdi.
Xabarga ko‘ra, 2020-yil 11-aprel kuni Xatirchi tumani IIBga tuman markaziy shifoxonasidan telefon orqali murojaat kelib tushgan. Unda 1990-yilda tug‘ilgan, Xatirchi tumanida istiqomat qiluvchi fuqaro K.A. tan jarohati olgan holda kasalxonaga yotqizilganligi ma’lum qilingan.
Tuman IIB HPB xodimlari olib borgan surishtiruv natijalariga ko‘ra, K.A.ga 1984-yil Xatirchi tumanida tug‘ilgan akasi K.B. o‘zaro oilaviy kelishmovchiliklar sabab tan jarohati yetkazgani aniqlangan.
Mazkur holat yuzasidan K.B. qonuniy tartibda jazoga tortilgan, deyiladi xabarda. Navoiy IIB axborot xizmati vaziyatni o‘rganish jarayonida aniqlangan sabablar va oqibatlar jinoyat motivi uchun o‘ta sodda ekani oydinlashgani haqida yozgan. Karantin muddatida zerikish va ruhiy zo‘riqishni va’j qilgan holda jahlni boshqara olmaslik, irodasizlik hamda shoshqaloqlik qondosh jigarlarning bir-biriga tazyiq o‘tkazishiga sabab bo‘lganini bayon qilgan, ammo xabarda aka-ukaning o‘zaro janjaliga aynan nima sabab bo‘lgani ochiqlanmagan.
Avval mart oyida Sirdaryodagi janjalda temir qaychi bilan odamga og‘ir tan jarohati yetkazgan shaxs ushlangani, shuningdek, Toshkent viloyati Nurafshon shahrida keksa odamlarga tan jarohati yetkazgan odamning qo‘lga olingani haqida xabarlar berilgan.
Izoh (0)