Қирғизистонда коронавирус билан касалланиш бўйича яна 17 та ҳолат қайд этилди. 16 апрель ҳолатига кўра, бутун мамлакат бўйлаб COVID-19 коронавирус инфекцияси билан касалланганлар сони 466 кишига етди. Бу ҳақда Қирғизистон Соғлиқни сақлаш вазирлигига таяниб, «Kloop.kg» хабар берди.
Касалланиш бўйича янги ҳолатлар Бишкекда — 5, Ўш вилоятида — 1, Норин вилояитда — 11 кишида аниқланган.
Айни вақтда касалларнинг асосий қисми — 131 бемор Ўш вилояти ҳисобига тўғри келмоқда. Ундан кейинги поғонада 93 нафар бемор билан Жалолобод вилояти ўрин олган. Иссиқкўл ва Боткен вилоятларида коронавирус билан касалланиш бўйича тегишли равишда 6 ва 5 та ҳолат аниқланган. Талас вилоятида эса COVID-19 бўйича бирорта ҳам ҳолат қайд этилмаган.
Инфекцияни юқтириб олганларнинг 251 нафари аёл бўлса, 215 нафари эркаклар. Стационарда 370 нафар фуқаро даволанмоқда. Ўтган бир сутка ичида стационардан COVID-19 ташхиси қўйилган 13 беморга жавоб берилган. Бутун мамлакат бўйлаб коронавирусдан даволанганлар сони 91 кишига етди. Ҳозирга қадар мамлакатда COVID-19 оқибатида 5 киши вафот этди
Эслатиб ўтамиз, Қирғизистонда пандемия сабаб 15 апрелга қадар фавқулодда ҳолат режими жорий этилган эди. Ўзбекистонда эса коронавирус билан касалланганлар сони 16 апрель соат 10:00 ҳолатига кўра, 1349 кишига етди. Ўтган бир ой давомида коронавирусга чалинган беморларнинг тўрт нафари вафот этди, 107 нафари эса соғайиб, реабилитацияга олинди.
Изоҳ (0)