Германия канцлери Ангела Меркель келаси ҳафтадан бошлаб мамлакатда эълон қилинган карантин чораларининг қисман енгиллаштирилишини билдирди. У ушбу баёнотни Берлинда барча федерал ерлар раҳбарлари билан ўтказилган учрашувда маълум қилган, дея хабар берди Bloomberg.
Меркель коронавирус инфекцияси тарқалишига қарши курашда маълум маънода муваффақиятга эришилганини қайд этиб, ҳали мамлакатда бу борада амалга оширилган ишлар самараси мақтанадиган ёки ўзни эркин ҳис қила оладиган даражада эмаслигини таъкидлади.
Меркелнинг сўзларига кўра, келаси ҳафтадан бошлаб мамлакатда майдони 800 квадрат метрдан катта бўлмаган велосипед ва китоб дўконларининг очилишига рухсат этилади. 4 майдан мактаблардаги таълим қайта бошланади ва сартарошхоналар фаолияти ҳам тикланади.
Меркель мамлакатдаги тўлиқ нормал ҳаётга бир неча ҳафта ёки ойдан кейин қайтиш кутилаётганини айтиб ўтди. Ресторан, бар, кинотеатр, меҳмонхона ва фитнесс-клублар ёпиқ бўлади, черковга боришга тақиқ ҳам сақланиб қолади. Оммавия тадбирлар, жумладан, мухлислар иштирокидаги футбол учрашувларини ўтказишга августдан эрта рухсат берилмайди.
Германия аҳолисидан ҳали ҳам ижтимоий масофаланишга риоя қилиш, дўконлар ва жамоат транспортида тиббий ниқоб таққан ҳолда ҳаракатланиш сўралмоқда. Карантин чекловлари уч ҳафта аввал қўлланила бошлаган. Берлинда ушбу тақиқлар сабаб эпидемия тарқалишининг салбий сценарийси амалга ошмаганлиги айтилмоқда.
Германиядаги иқтисодий танглик сабаб бир нечта ҳудудларнинг раҳбарлари ҳамда катта корхоналар вакиллари карантинни тезроқ бекор қилишни сўраган. Аммо Соғлиқни сақлаш вазирлиги ушбу талаб ва илтимосларни рад этган. Шу сабабли ҳам келаси ҳафтадан асосан кичик ва ўрта бизнес бўйича чекловлар аста-секин, босқичма-босқич бекор қилиниши бошланади
Германияда жами 133 200 нафар киши коронавирус юқтириб олган. Мамлакат бу борада дунёда 5-ўринни эгаллаб турибди. Бироқ ўлим кўрсаткичи бўйича вазият анча оғир, Германияда 3592 нафар киши COVID-19’дан вафот этган: бу Эрон ва Бельгияга нисбатан камроқ.
Tagesspiegel маълумотларига кўра, карантинга ҳамма ҳудудларда ҳам бирдек риоя этилмаяпти. Масалан, Баварияда 35 минг нафар инсон коронавирусга чалинган (995 киши вафот этган), Шимолия Рейн-Вестфакута ва Баден-Вюртембергда 27 минг нафар одам COVID-19 юқтириб олган. Тюрингияда 1564 нафар, Саксонияда 1239 нафар, Мекленбург-Померанияда 624 нафар кишида (12 нафари вафот этган) коронавирус аниқланган.
Берлинда эпидемия даври давомида 4870 нафар инсон касалликка чалинган, 74 нафар бемор вафот этган.
Мавзуга доир:
Изоҳ (0)