«Шарль де Голль» ҳарбий кемасида ва «Шевалье Поль» фрегатида 668 нафар француз денгизчиларида коронавирус инфекцияси аниқланди. Бу ҳақда мамлакат мудофаа вазирлигига таяниб, France Bleu нашри хабар берган.
14 апрель оқшомида кемаларнинг 1767 нафар аъзоси коронавирусга тест топширган.
«Айни вақтда 31 нафар одам Тулондаги Авлиё Анна госпиталига жойлаштирилган, улардан бири жонлантириш бўлимидаги алоҳида хонага жойлаштирилган», — дейилади хабарда. Ҳарбийлар касалланганлар сони бўйича рақамлар ўзгариши мумкинлигини ҳам таъкидлаган.
Авиация мақсадларида фойдаланиладиган улкан ҳарбий кема Тулон портига 12 апрелда муддатидан аввал, 23 апрелгача давом этиши керак бўлган миссиясини якунига етказмасдан, қайтиб келган. Мамлакатда кемалар сўнгги бор 15 март куни портга кирган. Франция соғлиқни сақлаш хизмати мутахассислари денгизчиларнинг коронавирус инфекциясини қандай юқтириб олганини тушунтириш қийинлигини таъкидлаган.
Кема бортида коронавирус инфекцияси борлиги 8 апрель куни гумон қилинган ва шу куннинг ўзида «Шарль де Голль» ҳарбий кемасига инфекцияни аниқловчи тестлар билан махсус шифокорлар гуруҳи етиб келган. Таҳлиллардан кейин кемада 50 нафар касаллик ташувчиси борлиги аниқланган.
Франция ҳарбий кемасининг 1700 нафар ва «Шевалье Поль» фрегатининг 200 нафар денгизчиси икки ҳафта муддатга Тулондаги ҳарбий денгиз базаси Вареда карантинган олинган. Изоляция билан параллел равишда кемадаги барча ҳарбий қуроллар ва самолётлар дезинфекция қилина бошланди. Махсус операция миллий флот бўлинмалари, Марсель ўт ўчирувчи матросларининг батальони ва фуқаролик бўлинмалари билан ҳамкорликда амалга оширилган.
Аввалроқ Россия армиясида коронавирус билан касалланган ҳарбийлар борлиги маълум бўлгани, Хоразмда ҳарбий қисмдаги карантиндагилар орасида коронавирус тарқалганининг тасдиқлангани ҳақида хабарлар берилганди.
Изоҳ (0)