«Дарё» оқшоми: коронавирус пандемияси бўйича 16 апрелнинг асосий хабарлари

Жаҳондаги вазият

Жонс Ҳопкинс университетининг Тошкент вақти билан соат 20:50 даги маълумотларига кўра:

• Дунё бўйича инфекция билан касалланганлар — 2 088 425 киши;
• Касалликдан тузалганлар — 525 884 киши;
• Инфекция оқибатида вафот этганлар — 138 487 киши.

Тошкент вақти билан соат 09:40 ҳолатига кўра, АҚШда 30 925 та ўлим ҳолати қайд этилган. Бутун мамлакат бўйлаб коронавирус билан касалланганлар сони 639 055 кишига етди, 52,6 минг киши соғайишга муваффақ бўлди.

Россияда сўнгги бир суткада коронавирусни юқтириб олганлар сони мамлакатнинг 84 та ҳудудида 3448 кишига ортиб, коронавирусга чалинганлар сони 30 минг кишига яқинлашди. Вафот этганлар сони эса 232 кишига етди. Умумий ҳисобда 2304 киши касалликдан тузалган.

Хитой Соғлиқни сақлаш миллий комиссияси маълумотларига кўра, мамлакатда ўтган бир сутка ичида 46 кишида коронавирус аниқланган. Маълумотларга кўра, 34 нафар бемор хориждан кириб келган, 12 нафари эса мамлакатда касалликни юқтириб олган. Ўтган бир сутка ичида беморлардан ҳеч бири вафот этмаган.

Қозоғистонда коронавирус билан касалланиш бўйича яна 36 та ҳолат қайд этилиб, жами касаллар сони 1362 кишига етди. Ҳозирга қадар мамлакатда умумий ҳисобда коронавирусдан 16 киши вафот этди.

Қирғизистонда коронавирус билан касалланиш 16 апрель ҳолатига кўра, 466 кишига етди. Бутун мамлакат бўйлаб коронавирусдан даволанганлар сони 91 кишига етди. Ҳозирга қадар мамлакатда COVID-19 оқибатида 5 киши вафот этди.

Ўзбекистондаги вазият

Ўзбекистонда 16 апрель соат 10:00 ҳолатига кўра, коронавирус инфекциясини юқтириб олганлар сони 1349 нафарни ташкил этмоқда. Ўзбекистонда ўтган бир ой давомида коронавирусга чалинган беморларнинг тўрт нафари вафот этди.  Хорижда камида 23 ўзбекистонликда коронавирус аниқланган, уларнинг уч нафари вафот этган.

Маълумот учун, Ўзбекистонда 8 апрель куни 26 кишида, 9 апрель куни 36 кишида, 10 апрель куни 87 кишида, 11 апрель куни 98 кишида, 12 апрель куни ҳам 98 кишида, 13 апрель куни 133 кишида, 14 апрель куни 167 кишида, 15 апрель куни эса 137 кишида коронавирус инфекцияси аниқланди.

Ҳозирги вақтда шундан 325 нафари Тошкент шаҳрида даволанмоқда (ҳудудларда айни вақтда даволанаётган беморлар сони 913 нафар). Бу ҳақда Вазирлар Маҳкамаси ҳузуридаги Санитария-эпидемиология назорати давлат инспекцияси бошлиғи Нурмат Отабеков маълум қилди.

Вирусология илмий-текшириш институти раҳбариятидан олинган маълумотга кўра, институт клиникасида даволанаётган 100 нафар бемордан тўрт нафарининг аҳволи оғир, бир беморнинг аҳволи нисбатан оғир, яна бир нафарининг аҳволи эса ўта оғир, деб баҳоланмоқда. Даволанаётган беморларнинг 26 нафарида пневмония клиник белгилари кузатилмоқда.

Эпидемиология, микробиология ва юқумли касалликлар илмий-текшириш институти раҳбариятидан олинган маълумотга кўра, ушбу институт клиникасида даволанаётган 101 нафар бемордан икки нафарининг аҳволи оғир деб баҳоланмоқда. Тошкент тиббиёт академияси (ТошМИ)нинг кўп тармоқли клиникасида даволанаётган 124 нафар бемордан олти нафарининг аҳволи оғир деб баҳоланмоқда.

Тошкент шаҳридаги Эпидемиология, микробиология ва юқумли касалликлари илмий-текшириш институти клиникасида коронавирус инфекциясига чалинган 70 ёшлик бемор бемор буткул соғайди. У мулоқот орқали коронавирус инфекциясини юқтириб олган. Аввалроқ Бухорода 20 киши, Хоразмда 1 киши касалликдан соғайиб, реабилитацияга жўнатилгани ҳақида хабарлар берилган эди. Ҳозирга қадар Ўзбекистонда коронавирус инфекциясидан тузалганлар сони 129 нафарга етди.

Сурхондарё вилоятида 23 нафар фуқаронинг коронавирус инфекцияси билан касаллангани аниқланган. Вилоят соғлиқни сақлаш бошқармаси бошлиғи Бобохон Шукуровнинг маълум қилишича, қайд этилган 23 нафар беморнинг 20 нафари 28 март куни Москва шаҳридан чартер рейс билан Термизга олиб келинган. Мазкур рейс йўловчилари Ангор туманида карантинга олинганди. Коронавирус аниқланган 23 нафар беморнинг 3 нафари эса мамлакатлараро қатнайдиган юк машиналари ҳайдовчилари ҳисобланади.

Ўзбекистонда нима гап?

Тошкентдаги Инҳа университети талабалари сенсорли «ақлли ниқоб» ихтиро қилди. Ниқоб одамнинг тана ҳарорати, йўтал, аксириш ва нафас олишда бўлаётган қийинчиликлардан унда коронавирус аломатлари бор-йўқлигини аниқлаб беради.

Ўзбекистонда коронавирусдан соғайганларнинг қон зардобидан фойдаланишга ҳозирча эҳтиёж йўқлиги маълум қилинди. Коронавирусга қарши кураш штаби аъзоси Ҳабибулла Оқилов бу масалага тўхталиб ўтди.

Тошкентда коронавирусга чалинган беморларни ТошМИ клиникасига ётқизиш бошланди. Бунгача пойтахтда коронавирусга чалинган беморлар Вирусология ҳамда Эпидемиология институти клиникаларига ётқизилаётган эди.

Молия вазирлиги: Коронавирусга қарши курашаётган тиббиёт ходимларига белгиланган устама ва қўшимча тўловлар вақтида ўтказиб берилмоқда. Маълумотларга кўра, 2020 йилнинг 15 апрель ҳолатига кўра, ҳудудий санитария-эпидемиологик осойишталик марказларининг ғазна ҳисоб варақларида юридик мажбуриятлар билан банд қилинмаган 38 миллиард сўм захира маблағлари мавжуд.

Меҳнат вазири COVID-19 оқибатларини юмшатиш учун Cotton Campaign’дан ўзбек пахтасига бойкотни тўхтатишни сўради. Ҳисоб-китобларга кўра, бу тўқимачилик маҳсулотлари экспорт ҳажмини икки баробарга ошириб, аҳоли учун иш ўринларини яратади.

Мактаб дарсликларини Тошкентда қолдириб, вилоятларга кетган ўқувчиларни баҳолаш қандай амалга оширилади? ХТВ электрон дарсликларни «uzedu.uz» сайтидан кўчириб олиш мумкинлигини маълум қилди. Шунингдек, Халқ таълими вазирлиги уйда якка тартибда таълим олишни ташкил этиш тартиби ҳақида маълумот берди.

Ўзбекистон Мусулмонлари идораси вакили: «Ифторликни, албатта, дастурхон ёзиб, тўп-тўп одам айтиш, деб тушунмаслик керак». Ифторлик харажатларини муҳтож, камбағал рўзадорларга бериш билан киши уларга ифторлик қилиб берганнинг савобини олиши айтилди.

Бош прокуратура коронавирус сабабли Ўзбекистон халқига мурожаат йўллади. Бош прокуратура глобал инқироз ва пандемия шароитида прокуратура органлари томонидан амалга оширилиши шарт бўлган қўшимча вазифаларни белгилаб олди.

Жаҳонда нима гап?

Трамп АҚШда коронавируснинг энг юқори чўққиси ортда қолганини маълум қилди. Вазиятнинг яхшиланиши ҳукуматга пандемия сабаб жорий этилган чекловларни бекор қилиш бўйича бир қарорга келишга ёрдам беради.

Канадалик олимлар коронавирус кўпайишини блокловчи препаратни топди. Гап Эбола безгагини даволаш учун яратилган «Ремдесивир» (RDV) дори воситаси ҳақида кетмоқда.

Германияда карантин чораларининг қисман бекор қилиниши эълон қилинди. Ангела Меркель мамлакатдаги тўлиқ нормал ҳаётга бир неча ҳафта ёки ойдан кейин қайтиш кутилаётганини айтиб ўтди.

Францияда 700 га яқин ҳарбий денгизчи коронавирус юқтириб олгани маълум бўлди. Ҳарбийлар касалланганлар сони бўйича рақамлар ўзгариши мумкинлигини ҳам таъкидлаган.

Россиялик шифокорлар америкалик олимларнинг COVID-19 бўйича тадқиқот хулосаларига баҳо берди. Юқумли касалликлар бўйича мутахассис Илья Акинфиевга кўра, коронавирус инфекциясида тумовнинг умуман бўлмаслиги асоссиздир.

Қозоғистонда коронавирус учун оммавий тест ўтказиш бошланади. Тест ўтказиш учун учта кўчма, тўртта стационар лаборатория тайёрланган. Шунингдек, мамлакатда 2,7 миллиондан ортиқ одамга 42 500 тенгедан ижтимоий нафақа тўлаб берилди. Аризалар энг кўп берилган ҳудудлар орасида 667 116 та ариза билан Олмаота вилояти биринчи ўринни эгаллаган.

«Хроника Туркменистана» ўз манбаларига таяниб, Туркманистоннинг Туркманобод шаҳридаги карантин зонасида COVID-19 коронавирус инфекцияси билан касалланган етти киши сақланаётгани ҳақида хабар берди.

Коронавирусга чалинган илк бемор Ухандаги лаборатория ходими эканлиги маълум қилинди. У вирусни кўршапалакдан юқтирган.

Лондонда COVID-19 билан касалланган эр уйдан кетишини талаб қилган рафиқасини уриб ўлдирди. Гумонланувчининг хотини унинг коронавирусга чалинганини билганидан кейин эридан квартирадан йўқолишини сўраган.

Чилида коронавирусдан ўлганлар сони тузалганлар статистикасига қўшиб ҳисобланмоқда.

«Дарё» колумнисти Ўткирбек Холмирзаев коронавирус пайдо бўлиши ортидан жамият аъзоларида, уларнинг хулқ-атворида кузатилган айрим хулқий жараёнлар, когнитив янглишишлар ҳақида фикр юритади: «Хитойнинг ўзи айбдор», «Бу Америка фитнаси». Коронавирус ва у келтириб чиқарган когнитив янглишишлар ҳақида.

Ўқишни қатъий тавсия этамиз: Миллионлаб инфекция ташувчига ташхис қўйилмаганми? Математик моделлаштириш орқали пандемиянинг аниқ манзараси олинди.