Apple компанияси «уйга» тугмасига ва бир дона камерага эга ўзининг ҳамёнбоп iPhone SЕ қурилмасини тақдим этди, деб хабар беради The Verge.
Мазкур қурилма худди iPhone 8’га ўхшайди, бироқ анча замонавий тавсифларга эга. Телефонга 4,7 дюймли экран, ҳамда Touch ID тугмаси ўрнатилган.
Шунингдек, iPhone SЕ’нинг орқа томонида ф/1,8 диафрагмали 12 мегапикселга эга камера жойлашган. Ҳозирда ушбу камера битта камерали iPhone тизимлари орасида энг яхшиси деб аталмоқда. Камера портрет режимини, Smart HDR ва 4K видеоларни қўллаб-қувватлайди.
Олд томонига эса 7 мегапикселли камера ўрнатилган. Юқори синф iPhone’лари билан солиштирилганда iPhone SЕ’да тунги суратга олиш, юзни таниш ва наушникларда қайтариш режими мавжуд эмас. Смартфон чанг ва намликдан ҳимояланган. У бир метр чуқурликдаги сувда ярим соатгача тура олади.
Шунингдек, iPhone SE’да Qi стандарти бўйича симсиз ҳамда тезкор қувватланиш функцияси мавжуд. Apple’нинг таъкидлашича, қурилма 30 дақиқада 50 фоизга қадар қувватлана олади, бироқ бунинг учун алоҳида адаптер сотиб олиш керак.
Янги iPhone’лар учун буюртма 17 апрелдан бошлаб қабул қилинади, 24 апрелдан эса етказиб бериш бошланади.
64 гигабайт ички хотирага эга қурилманинг нархи 399 доллар, 128 гигабайтлиси эса 449 доллардан сотувга чиқади. Янги телефонлар ёрдамида Apple ТV Plus’дан бир йил давомида бепул фойдаланиш мумкин. Смартфон қора, оқ ва қизил рангларда ишлаб чиқарилади.
Изоҳ (0)