Apple компаниясининг навбатдаги флагманлари нафақат 5G алоқа тармоғини қўллаб-қувватлайди, балки янгиланган дизайнга ҳам эга бўлади. Бу ҳақда Bloomberg компания режаларидан хабардор ўз манбаларига таяниб, маълум қилди.
Маълумотларга кўра, смартфонлар iPad Pro’нинг сўнгги версияси каби кўринишда бўлиб, янада ингичка ҳошия ва ўткир бурчакли металл корпусга эга бўлади. Қайсидир жиҳатдан флагманлар iPhone 5’га ўхшаб кетади.
Таъкидланишича, янги iPhone Pro учта камерани сақлаб қолади, кичик моделда эса iPhone 11 каби иккита камера бўлади. Бироқ флагманлар компания ўзининг янги iPad Pro 2020’сига ўрнатган LIDAR’га (ёруғлик ёрдамида масофани аниқлаш ва ўлчашга мўлжалланган технология) эга бўлади. Шунингдек, смартфонларга янада кучлироқ процессор ўрнатилиши кутилмоқда.
iPhone’нинг 5G алоқа тармоғини қўллаб-қувватлаш қобилиятига эга энг оммабоп версиясига худди iPhone 11 Pro Мах’даги каби 6,5 дюймли экран ўрнатилади. Ҳозирда Apple фронтал камера ва Face ID датчиги ўрнатилган қирқимдан воз кечиш йўлларини қидирмоқда. 2020 йилда компания ҳеч бўлмаганда унинг ўлчамини кичрайтира олиши мумкин.
Коронавирус пандемияси сабаб ҳозирча янги флагманлар қачон тақдим этилиши номаълум.
Изоҳ (0)