АҚШда дунёда биринчи марта коронавирус вакцинаси одамда синаб кўрилди

Дунёда биринчи бўлиб АҚШнинг COVID-19 коронавирусига қарши вакцинасини олган америкалик Женнифер Холлер The Telegraph нашрига бу ҳақда ўзининг таассуротларини гапириб берди.

Айни пайтда Вашингтоннинг Сиэтл шаҳрида изоляцияда бўлган 44 ёшли аёлнинг айтишича, вакцинани унинг чап елкасига қилишган. Жараён атиги бир неча сония давом этган.

«Биринчи куни ҳароратим бироз кўтарилди. Иккинчи куни қўлим қаттиқ оғриди. Бўлди — шундан сўнг ҳаммаси жойига тушди», — дейди у. Аёлнинг сўзларига кўра, инъекциялаш жараёни гриппга қарши одатий эмланишга ўхшаган.

Қайд этилишича, кейинги ҳафтада Халлерга вакцинанинг иккинчи дозаси қилинади. У кун бўйи шифокорлар назорати остида бўлади.

The Telegraph’нинг ёзишича, вакцина mRNА-1273 деб номланган. У Сиэтлдаги Аллергия ва юқумли касалликлар миллий институтида яратилган. Дастлаб у ҳайвонларда синаб кўрилган. Натижалар ижобий чиққан, шундан сўнг уни одамда синаб кўришга қарор қилинган.

Синов учун 45 нафар кўнгилли танлаб олинган. Уларнинг ҳар бирига 28 кун давомида бир хил дозада 2 тадан инъекция қилинади. Бунда дозалар ҳажмига кўра (25, 100 ва 150 мкг) фарқ қилади. Вакцина синовида иштирок этишга қарор қилган кўнгиллилар 2021 йилнинг баҳорига қадар кузатувда бўлади.

Аввалроқ АҚШда коронавирусни безгакка қарши дорилар билан даволашга рухсат берилган эди. Шунингдек, АҚШда COVID-19 коронавирусига қарши вакцина ишлаб чиқиш бўйича клиник синовлар бошлангани, вакцина Вашингтондаги Саломатлик миллий институти томонидан ишлаб чиқилаётгани ҳақида хабар берилганди.

Британиядаги hVIVO тадқиқот гуруҳининг коронавирусга қарши вакцина ишлаб чиқиш ва шунга ўхшаш вирусни юқтириш дастурида иштирок этишга 20 мингдан ортиқ одам рози бўлган. 6 апрель куни Туркияда коронавирусга қарши вакцина ҳайвонларда муваффақиятли тест қилинган.

Жонс Ҳопкинс маълумотларига кўра, дунё бўйича коронавирусга чалинганлар сони 1 миллион 982 минг кишидан, вафот этганлар сони 126 минг кишидан ошди. АҚШда коронавирус билан касалланганлар сони 600 минг кишидан ошди, Ўзбекистонда эса 1214 кишига етди.