Европада коронавирус тарқалишининг асосий марказлари бўлган Испания ва Италияда икки ҳафтадан буён коронавирусга чалиниш ва ундан вафот этиш ҳолатларининг сони камаймоқда. Бу ҳақда «РБК» хабар берди.
Испанияда 13 апрель куни коронавирусдан 517 киши вафот этган, 12 апрель куни эса бу кўрсаткич 510 кишини ташкил қилган. Бу 25 мартдан буён қайд этилган энг паст кўрсаткичлар бўлган. Италияда 13 апрель куни 567 киши, 12 апрель куни 431 киши коронавирус сабабли вафот этган ҳамда 21 мартдан кейинги энг паст кўрсаткич қайд этилган. Эпидемия чўққисига чиққан вақтда ҳар бир мамлакатда қурбонлар сони кунига деярли минг нафарга етган. Италияда 28 март куни 971 киши касалликдан вафот этган, Испанияда эса 3 ва 4 апрель кунлари мос равишда 950 ва 932 та ўлим қайд этилган. Испанияда жами 18 минг киши, Италияда эса 20 мингдан ортиқ киши коронавирусдан вафот этган.
Мазкур мамлакатларнинг соғлиқни сақлаш тизимларида юклама ҳанузгача оғир бўлиб қолмоқда. Испанияда коронавирусга чалинганларнинг 15 фоизини тиббиёт ходимлари ташкил қилади. Италияда коронавирусдан вафот этган шифокорлар сони 100 нафардан ошган. Италияда 4 апрелда эпидемия бошланганидан буён биринчи марта интенсив терапия палаталаридаги беморлар сони камайган. Шунга ўхшаш ҳолат Испанияда ҳам апрель ойининг бошидан буён кузатилмоқда, оғир аҳволдаги беморлар сони кўпаймаяпти. Одатда, оғир аҳволдаги беморлар тузалиши учун 2-3 ҳафта давомида сунъий нафас олдириш аппаратига уланиши керак. Узоқ муддатли реабилитация коронавирусдан тузалишнинг ўзига хос томонларидан бири ҳисобланади.
Кунлик аниқланган янги ҳолатлар сони сўнгги 2-3 ҳафтада икки мартадан кўпроққа камайди. Испанияда энг кўп ҳолат 1 апрель куни қайд этилган — 9222 кишида коронавирус аниқланган. 13 апрель куни 3477 та янги ҳолат қайд этилган. Италияда эса энг юқори кўрсаткич 22 мартга тўғри келган, шу куни мамлакатда 6557 та янги ҳолат аниқланган. Италияда 13 апрель куни 3153 та янги ҳолат рўйхатга олинган. Шу куни Испания ва Италияда мос равишда 2336 нафар ва 1224 нафар бемор тузалган.
Дунёда касалланганлар ва вафот этганлар сони бўйича АҚШ биринчи ўринда кетмоқда. Ундан кейинги ўринлардан эса Испания, Италия, Германия, Франция ва Буюк Британия бормоқда.
Германияда касалланганларнинг сони 125 минг кишига етган, 2969 та ўлим қайд этилган. Мазкур мамлакатда янги ҳолатлар сони 10 апрелдан буён камаймоқда, ўша куни коронавирус 5323 кишида аниқланган. Сўнгги уч кунда янги касалланганлар сони бир неча юз кишига камайган, 14 апрелда 2082 кишини ташкил қилган.
Францияда 14 апрель куни касалланганларнинг умумий сони 103 минг кишига етган. Ўлим ҳолатлари сони 15 мингтадан ошган. Янги ҳолатлар сони 11 апрелдан буён сезиларли камайган. Ўша куни 4342 та янги ҳолат қайд этилган бўлса, 13 апрелда бу кўрсаткич 1613 нафарни ташкил қилган, бироқ 14 апрель 5497 та янги ҳолат ҳақида хабар берилган.
Буюк Британиядаги вазият ҳам барқарор эмас. Энг кўп қайд этилган янги ҳолатлар ҳозирча 12 апрелга тўғри келган. Ўша куни 8719 та янги ҳолат аниқланган бўлса, кейинги икки кунда уларнинг сони камайиб, 14 апрель куни 4342 тани ташкил қилган. Мамлакатда коронавирусни юқтирганларнинг умумий сони 88 600 кишидан, қайд этилган ўлимлар сони эса 1300 тадан ошган.
Аввалроқ Италияда ўтган сутка давомида касалланганлар сони бўйича энг паст кўрсаткич қайд этилгани ҳамда Испания ва Италияда бир қатор компаниялар учун карантин чоралари енгиллаштирилгани ҳақида хабар берилган эди. Шунингдек, Австрия коронавирус сабаб жорий этилган чеклов чораларини бекор қилишни бошлаган.
Изоҳ (0)