Хитой Соғлиқни сақлаш миллий комиссияси маълумотларига кўра, мамлакатда ўтган бир сутка ичида 46 кишида коронавирус аниқланди, беморларнинг 78 нафари тузалди, 1 киши вафот этди.
Қайд этилишича, янги касалланган 46 беморнинг 36 нафари вирусни четдан, қолган 10 нафари мамлакатнинг ўзида юқтирган. Айни пайтда вирусни четдан юқтириш бўйича умумий ҳисобда 1 500 та ҳолат қайд этилган. Уларнинг 904 нафари ҳали ҳам касалланганлигича қолмоқда (шундан 45 нафари оғир аҳволда), 596 киши тузалган. Вирусни четдан юқтирганларнинг бирортаси вафот этмаган.
Жонс Ҳопкинс маълумотларига кўра, айни пайтда Хитойда умумий ҳисобда 83 351 киши коронавирусга чалингани қайд этилган, 3 346 киши вафот этган.
Хитой ҳукумати 1 апрелдан бошлаб коронавирус ҳеч қандай белгиларсиз тарқалаётгани ҳақида маълум қилганди. Сўнгги суткада 57 та шундай ҳолат аниқланган. Уларнинг 3 таси четдан юқтирилган.
Шунингдек, ўтган бир сутка ичида 32 кишига карантиндан жавоб берилган. Тест уларда вирус борлигини кўрсатган бўлса ҳам, касалликнинг ҳеч қандай аломатлари аниқланмаган. Айни пайтда касаллик аломатлари кузатилмаётган яна 1 023 киши шифокорлар назоратида бўлиб турибди.
Эпидемия ўчоғи бўлган Хубэй провинциясида эса сўнгги сутка давомида коронавируга чалиниш билан боғлиқ янги ҳолатлар аниқланмаган, 39 кишига касалхонадан жавоб берилган (уларнинг барчаси Ухань шаҳридан).
Аввалроқ Хитой ўз ҳудудида коронавирус эпидемияси тўхтаганини эълон қилганди. Кейинчалик мамлакат бош эпидемиологи Хитойда коронавируснинг иккинчи тўлқини содир бўлиши эҳтимолини баҳолади. COVID-19 ни даволаш бўйича Шанхайдаги экспертлар гуруҳи аъзоси инсоният ёз фаслида коронавирус пандемиясидан буткул қутула олмаслиги, ноябрь ойида касалликнинг янги тўлқини юзага келиши мумкинлигини айтди.
Изоҳ (0)