Ўзбекистон Транспорт вазирлиги ахборот хизмати раҳбари Наврўз Ашурматов 14 апрель куни АОКА штабида ўтказилган брифингда аҳолидан келиб тушаётган саволларга жавоб берди. Унда 13 апрель куни соат тунги 01:00 Тошкент вилоятида жойлашган карантин зонасидан олиб келинаётган 50 нафар фуқаро йўлда қолдириб кетилгани юзасидан изоҳ сўралди.
Наврўз Ашурматовнинг билдиришича, мазкур ҳолат бўйича ўтказилган ўрганиш ишларида хабар мутлақо асоссиз ва ҳақиқатдан йироқ эканлиги ойдинлашди. Унинг таъкидлашича, шу куни автобус ҳайдовчиси карантин муддати тугаб уйларига қайтаётган барча йўловчиларни ўз манзилларига етказиб қўйган.
«Бироқ жорий йилнинг 10 апрель куни Тошкент вилояти Юқори Чирчиқ туманида жойлашган карантин ўташ махсус ҳудудида бўлган ва уйига жавоб берилган фуқароларни доимий яшаш манзилларига етказиб қўйиш давомида автобус ҳайдовчиси ва йўловчиларнинг ўзаро тушунмовчилиги сабаб ҳақиқатан ҳам 3 нафар фуқарони ўз манзилига (Ал-Хоразмий мавзесига) етказмасдан Фарҳод бозори атрофида тушириб қолдирган. Натижада бу фуқаролар йўлда қолиб кетишган. Ҳайдовчининг бу хатоси сабаб унга нисбатан маъмурий жавобгарлик жазоси қўлланилди», — деган Ашурматов.
Мавзуга доир: Тошкентда автобус ҳайдовчиси карантиндан чиққанларни уйларига етказмасдан йўлда ташлаб кетгани маълум бўлди
Бундан ташқари, фуқароларни кичик массив ва маҳалларга олиб кириш учун Тошкент шаҳар ички ишлар бош бошқармаси туман бўлимларининг пост-патрул хизмати ходимлари томонидан уйга етказиш чоралари кўрилмоқда.
Изоҳ (0)