Қашқадарё вилоятининг Муборак туманида яшовчи шифокорлар карантин қоидаларига зид равишда тўй ўтказган. Бу ҳақда «Дарё» мухбири маълум қилмоқда. Таъкидланишича, тўй 14 апрель куни бўлиб ўтган. Тўйга 50 нафар меҳмон чақирилган.
«Куёвнинг онаси билан суҳбатлашганимизда тўйга хонанда чақирмадик, шунчаки, келинни олиб келдик деди», — дейди «Дарё» мухбири билан суҳбатлашган манба. Қўшимча қилинишича, келиннинг отаси М.Р. тез тиббий ёрдамда бош шифокор, онаси Т.Х. ҳам шифокор бўлиб ишлайди. Оила туманнинг «Қурувчилар» маҳалласида яшайди. Куёвнинг опаси Ф.А. ҳам олий тоифали шифокор.
Қашқадарё соғлиқни сақлаш бошқармаси ахборот хизмати ижтимоий тармоқда тарқалган бу хабар ўрганилаётганини, қудалар тиббиёт ходимлари эканлигига ойдинлик киритилишини ёзган. Айни пайтда мазкур ҳолат юзасидан суриштирув олиб борилмоқда.
Аввалроқ Тошкентнинг Юнусобод туманида карантин вақтида куёв-навкар маросими ўтказилгани, тадбир ташкилотчиси ҳисобланган келиннинг отасига нисбатан жиноий иш қўзғатилгани ҳақида хабар берилган эди. Бундан ташқари, Чилонзор туманида ҳам тўй маросимини ўтказишга уриниш ҳолати қайд этилгани хабар қилинган эди.
Мавзуга доир: Шавкат Мирзиёев карантин вақтида тўй-маросим ўтказганларни «масъулиятсизлар» деб атади
Эслатиб ўтамиз, жорий йил 23 мартдан бошлаб Ўзбекистонда тўйлар ва бошқа оммавий тадбирлар ўтказиш тақиқланган. Шунингдек, фуқароларнинг ўта заруратсиз уйдан чиқиши чекланган, бемақсад кўчада юрганлар жавобгарликка тортилмоқда.
Изоҳ (0)